-Almmuhus-
KULTUVRABálkkašupmi poddai mainna botkeba tabuáššiid jaskatvuođa

Bálkkašupmi poddai mainna botkeba tabuáššiid jaskatvuođa

Journalista

-

-

Botkeba jaskatvuođa ja norpmaid poddain. Dál oažžuba bálkkašumi.

Botket jaskatvuođa ja norpmaid Sámis lei dehálaš jođihanfápmu Merethe Kuhmunenas ja Monica Anderssonas go fuomášeigga Sameradiopoddena, «Duohta Ivnnit». 

Dál bálkkašuvvoba iežaska áŋgiruššamiin 2018 Silverslevain, journalistabálkkašupmi man Publicist Club Norra Norrland lea ásahan, mii jahkásaččat juhkko journalistii dahje redaktevrii.

Norra Norrland ákkastálla ná:

«Sáhkkis journalisttalaš ságastallan sáhttá muitalit olu. Servodaga birra, eallima birra ja min birra. Sámeradiopoddas «Duohta Ivnnis» deaivvadit jálos olbmuiguin geat rahpasit juogadit váttis ja tabu-váttisvuođaid nu go endometriosa, HBTQ+, seksa, miehtan, boasttugeavaheapmi ja iešsoardinváttisvuohta sámi servodagas. Sáhkkiivuođain ja áŋgirit bidjaba prográmmajođiheaddjit Merethe Kuhmunen ja Monica Andersson olmmošlašvuorbbi guovddážii ja hutkaba dehálaš ja árvvolaš journalistihka mii váikkuha olggobeale Sámi maid.»

 

Giitevaččat

– Mearkkaša hui olu munnje ja Monicai go munno bargu fuomášuvvo ná. Giitosat buohkaide geat leat leamaš mielde poddas, din haga ii livčče mihkke, dadjá Merethe Kuhmunen preassadieđáhusas.

 

Luohttámuš Sámeradiopoddai ja prográmmajođiheddjiide

Váldoulbmiljoavku leat nuorra sámi rávesolbmot geat áigot diehtit eambbo tabuáššiid birra, muhto sisdoallu lea heivehuvvon nu ahte earát maid sáhttet guldalit ja ipmirdit. 

– Prográmma lea váikkuhan rabas digaštallamiid váttis fáttáid birra Sámis. Dat ahte guossit leat duostan searvat ja muitalit iežaset birra, čájeha ahte lea luohttámuš Sámeradiopoddai ja prográmmajođiheddjiide Merethii ja Monicai, dadjá Sveriges Radio Sámerádio buvttadeaddji Thomas Sarri.

 

Ovddeš vuoiti

Norra Lorrland lea juohkán journalistabálkkašumi 2015 rájes.

Ovddeš vuitiid searvvis lea Gulspadvuoiti Arne Müller.

-Almmuhus-