-Almmuhus-
-Almmuhus-
-Almmuhus-
KULTUVRABálkkašupmi nuorra duostilis árbečeahppái

Bálkkašupmi nuorra duostilis árbečeahppái

-

-

Dán jagaš Tsumbarágibálkkašumi lea Iŋgor Ántte Ánte Mihkkala Marielle ožžon. Max Mackhé, gii geige, muitala ahte Marielle áŋgiruššá iežas áiggis čuollat sámi vuoigatvuođaid, muhto su beaivválaš sámi árbevirolaš máhttu čuovgá buot su daguin.

 

 

Max Mackhé lea njeallje jagi geigen iežas bálkkašumi olbmuide geat barget buorrin servvodahkii. Son lea dáiddár guhte čoaggá ruđaid iežas dáiddalaš bargguid vuođul ja badjelbáhcaga juolluda bálkkašupmái mii dán jagi lea šaddan 7500 ruvnno man son háliida addit Sara Marielle Gaup Beaskai.

 

Nuorra nana buorre árbečeahppi

Vuoiti lea dovddus lávlu ja juoigi, son lea nubbi Arvvas nammasaš čuojahanjoavkkus, oktan bássačuojaheddjiin Steinar Raknesain. 

– Sara Marielle Gaup Beaska lea nuorra árbečeahppi geas lea olu sámi árbevirolaš diehtu go galgá fievrredit sámi biras- ja vuoigatvuođaáššiid, dadjá Max Mackhé vuoiti birra gii iluin ja rámpomiin geige Tsumbaráiggi dán jagi bálkkašumi. 

 

Vuorddekeahttá juovlaskeaŋka 

Machké muitala ahte vuoiti lei ilus go oaččui dieđu ahte su bargu árvvus adno. Gaup Beaska lea guovtti máná eadni, son lea Rivttáin ja Guovdageainnus bajásšaddan ja lea vuosttaš jagiid rájes sámi jurddašemiin ja eallimis leamaš. 

  – Dán bálkkašumi lean erenoamážit jurddašan sutnje go son nu olu ieš lea bidjan návccaid čuollat sámi áššiid sihke olggobealde ja siskkobealde Sámi servvodaga, muhto sus lea nu olu máhttu movt ávkkástallat luonddu seammás go várjalit birrasa, čilge bálkkašumi geigejeaddji ja namuha ahte Marielle duojis boahtá dát maid bures ovdan.

 

Hirpmahuhtii sihke lágideddjiid ja berošteddjiid

Iŋgor Ántte Ánte Mihkkala Marielle lea luođi bidjan dálkkádatviehkamii «Run for your life» mii manai Girona ja Pariisa gaskka ovdalaš juovllaid. Dáinna luđiin bekkii son vuosttamuččas demonstrašuvnnain ja akšuvnnaid dálkkádatčoahkkimis COP21:s. Marielle maiddá rámpojuvvo iežas majestehtalaš oassálastimiin dain stuora vázzimiin Londonis skábmamánu 29. beaivvi masa sus lea alddis stuora beroštupmi biras- ja vuoigatvuođaid čuollat ja masa lei ráhkkanan hirbmat bures, dadjá Machkè.

Marielle válddii ovddasvástádusa go lágideaddjit áigo hilgut álgoálbmot ja sámi jiena demonstrašuvnnain, lei oalle dramáhtalaš, muhto Marielle liikká ii ballan ja gáibidii sátnesaji ja beassat ovddemužžii vázzimis nu go lei šihttojuvvon, čilge Machké. 

 – Danin lea Sara Marielle Gaup Beaska ánssášan vuoitit 7500 ruvnno Tsumbaráiggi bálkkašumi bokte, čilge Mackhé ja muitala ahte vuoiti čielga eallinvuogi bokte nanne son sámegiela, kultuvrra ja servvodaga, dát leage Mariellii lunddolaš eallin beaivválaččat, celkojuvvo loahpas.

 
-Almmuhus-