Skatteeataten dahje vearroásahus čađaha dáid beivviid riikkaviidosaš kampánjja váruhan dihtii máksimis čáhppes barggu ovddas bargiide geain eai leat buot báhpárat ortnegis.
Seammás čilgejit olbmuide mo galgat sihkkarastit ahte sii geaid bálkáhit, leat buot báhpárat ortnegis.
Maŋimuš áiggi lea Vearroásahus juohkán 175.000 diehtojuohkin gihppagiid norgalaš poastakássaide, mas olbmot ožžot dieđu mo galget garvit dakkár olbmuid amas eai dájuhuvvo.
– Geasset lávejit olbmot divvugoahtit dálu ja koronadilálašvuođain ožžo olusat liige áiggi ollašuhttit iešguđetlágan bargguid. Danin váruhat ja juohkit mii dieđuid maid olbmot berrešedje smiehttat ovdalgo oastigohtet iešguđetlágan duojáriid nugo snihkkáriid, máláriid, elrávnnjebargiid ja nu ain bálvalusaid iežaset dállui, lohká Vearroásahusa vearrorihkkun ossodaga vuolitdirektevra Trond Båtnes preassadieđáhusas.
Son rávve olbmuid dárkkistit fitnodat bedriftsdatabase báikkis, čállit čálalaš soahpamuša ja buot bargiin galgá leat HMS-koarta oidnosis barggus.
– Rehkegis galgá leat MVA dahje lassiárvodiva mielde. Mávsse báŋkku bokte. Mađe eanet áššiid don iskat, mađe sihkkarabbot leat don. Lea váddásat oažžut dohkkehuvvot váidaleami jus bargu ii leat ortnet mielde dáhkon. Soaittát šaddat buot vearuid ja divvagiid máksit maid nubbi bealli ii máksán, váruha Vearroásahusa vearrorihkkun ossodaga vuolitdirektevra Trond Båtnes.
Jus juoidá lea eahpečielggas, váldde vearroásahusain oktavuođa. Eambbo dieđut: handlehvitt.no
