Ikte galledeigga Guovdageainnu sátnejođiheaddji ja várresátnejođiheaddji Finnmark Rein njuovahaga Guovdageainnus. Doppe bođii ovdan ahte suohkan lea oččodeamen ealáhusfierpmádaga suohkanii.
Ikte galledeigga Guovdageainnu sátnejođiheaddji ja várresátnejođiheaddji Finnmark Rein njuovahaga Guovdageainnus. Doppe bođii ovdan ahte suohkan lea oččodeamen ealáhusfierpmádaga suohkanii.
– In leat konfirmašuvnna áiggi rájes fitnan dáppe
Ná ledje sánit Guovdageainnu sátnejođiheaddjis go áiddo bođii sisa. Njuovahaga beaivválaš jođiheaddji Arnt Inge Guttormsen oahpistii suohkan politihkkáriid báikái ja buvttadeapmái. Birrasiid diimmu Guttormsen ofelasttii Vasara ja Buljo.
– Mun gal lean hui duhtavaš. Hui buorre oaidnit iežan čalmmiiguin man stuoris dat doaibmá lea, man ollu bargit dáppe leat, muitala sátnejođiheaddji.
Ikte ledje Guovdageainnu suohkanis vuordime guossái boahtit Bargiidbellodaga váldočálli Kjersti Stenseng. Muhto Stenseng ii sáhttán boahtit. Danin beaivveprográmma mii lei dasa jurddašuvvon rievddai.
Prográmmii bázii Finnmark Rein njuovahaga gálledeapmi, gos sátnejođiheaddji Johan Vasara ja várresátnejođiheaddji Anders S. Buljo finaiga oahpásmuvan dihtii fitnodaga otná buvttadeapmái ja digaštallan dihte movt goappatge bealit, suohkan ja fitnodat, sáhttet leat buorren Guovdageidnui ja Sápmái.
Govven: Sergey Gavrilov
Proseanta dušše biergomárkanis
Politihkkár guovttos eaba lean boahtán dušše oaidnit movt bohccos ráhkadit bohccobiergobuktagiid, muhto maiddái gulan dihte fitnodaga áigumušaid.
Dása lei várrejuvvon diimmu čoahkkinastit Finnmark Rein assisteantadirektevrrain Johan Mathis Buljoin. Assisteantadirektevra muitalii fitnodaga duogáža, ambišuvnnaid, višuvnnaid ja ieš guđet ge loguid birra.
– Jus odne tacoi olbmot geavahivčče «finnebiff» biergun, de min «finnebiff» vuorkkát oanehis áiggis livčče gurrejuvvon. Vaikko mii leat stuorat go earát, de bohccobiergu lea dušše okta proseanta Norgga obbalaš biergobuvttadeamis, muhtin jagiid vuollel proseantta maid, muitala Finnmark Rein assisteantadirektevrrain Johan Mathis Buljo.
Boazodoalli galgá dinet
Finnmark Rein assisteantadirektevrrain Johan Mathis Buljo oaidná deháleamos áššin fitnodaga barggus, earret eará dan ahte boazodoalli galgá dinet dás go lea Finnmark Rein. Dán birra son muitalii suohkan politihkkáriidda.
– Vuođđojurddan lei go álggiimet, dat ahte boazoeaiggát galgá dinet buorebut ja buorebut. Mii eat boađe goassige bargat dan ovdii ahte boazoeaiggát galgá dinet unnit.
Dása Buljo mielas lea čoavddus.
– Mii boahtit bargat dan ovdii ahte gávdnat ođđa vugiid mo bohccos dinet vel buoret, čilge Finnmark Rein assisteantadirektevrrain Johan Mathis Buljo.
Iežas lohká alddiineaset leat jo jurdagiid dan ektui. Muhto dáid birra ii loga vuos háliidit mediaide muitalit go háliidit baicce beassat ráfis gárvestit visot.
Dás oainnát filmmaža ievttá galledeamis, mii šállošat heajos jietnadási ovddas.
«Kick-off» vuolggasadjin ealáhusfierpmádahkii
Suohkana bealis leat buori mielain guldalan Finnmark Rein fitnodaga áigumušaid. Ja dan oktavuođas Guovdageainnu suohkana sátnejođiheaddji namuha dáhpáhusa man ieš gohčoda «Kick-off».
– Mun lean rámis go min suohkanis lea dakkár fitnodat. Ja mii leat jurddašan bidjat johtui ealáhusfierpmádaga mii lea ávkin politihkalaččat suohkanii ja ealáhusfitnodagaide. Mas mii oaidnit suohkana buot fitnodagaid. Dáinna lágiin, ahte mo Guovdageainnu dahkat guovddáš báikin Sámis ealáhusmáilmmis? Dan mun gohčodan «Agenda Sápmi», čilge sátnejođiheaddji iežas jurdaga birra.
Su sániid mielde dakkár vuosttaš deaivvadeapmi plánejuvvo cuoŋománnui. Vasara jurdda lea vuosttažettiin oažžut sadjái oktasaš gulahallanarena mii sáhttá leat oktasaš e-boastalistu ja «Kick-off» deaivvadeapmi mas de fárrolaga jurddašit Guovdageainnu viidát, ii ge beare báikkálaččat. Oassin dakkár barggus Guovdageainnu suohkana sátnejođiheaddji namuhii ealáhusbeivviid.
Finnmark Rein fitnodaga assisteantadirektevrra Johan Mathis Buljo mielas dat lea buorre jurdda.
– Mii searvat. Jus eat oahpa, de goit sihkkarit mis lea máhtu maid sáhtit juogadit earáiguin, vástida Buljo.
Govven: Sergey Gavrilov
Duhtavaččat
Finnmark Rein fitnodaga assisteantadirektevra Johan Mathis Buljos ledje positiiva jurdagat maŋŋel čoahkkima Guovdageainnu suohkana njunuš politihkkáriiguin.
– Mun gal lean duhtavaš. Hui buorre go suohkan boahtá čoahkkimii. Mii beassat muitalit min doaimmaid birra, oanehaččat mearkkaša Johan Buljo.
Johan Vasara galledii njuovahaga vuosttaš háve sátnejođiheaddjiámmáhis. Danin lohká dat lei dehálaš fitnat.
– In mun guhká leamaš sátnejođiheaddjin. Mu mielas lei dehálaš oaidnit dakkár fitnodaga eallima Guovdageainnus. Go dát bargá, virgáda olbmuid dáppe ja buktá ruđaid suohkanii. Nu ahte dat lea buorre oaidnit.
