Vuolleahkásaš vuoddjit, geat leat váidon vuodjimis gárrenoaivvis, leat measta duppalaston diimmáža rájes.
Johtolatpolitiijaid logut čájehit ahte 71 olbmo leat váidon vuodján gárrenoaivvis Finnmárkku politiijaguovllus, golmma vuosttaš mánus dán jagi. Dat lea okta eanet go diibmá seamma áiggi, muhto 15 unnit go Romssa politiijaguovllus.
Riikkadásis leat 1980 biilavuoddji váidon vuodjimis gárrenoaivvis 2023 vuosttaš njealjádasjagis. Dat lea gaskamearálaččat 33 olbmo juohke beaivvi. Go diimmážiin buohtastahttá, lea obbalaš lohku lassánan 192 váidagiin.
Buohkat váldit ovddasvástádusa
MA- Rusfri Trafikk, organisašuvdna, mii bargá gárrenvuodjimiid eastademiin, oaivvilda ahte ii goassege leamaš nu dehálaš bidjat eanet návccaid dan bargui.
– Gárrenvuodjin lea stuora vahágin olbmuide juohke jagi. Go 71 olbmo leat vuodján gárrenoaivvis, leat dat 71 olbmo beare olu. Mii dárbbašit politiijaid geat leat oidnosis geainnuin, seammás go buohkat servvodagas fertejit váldit ovddasvástádusa. Min bargu lea miellaguottuid váikkuhit, ja láhčit eiseválddiide reaidduid vai sáhttet dahkat rievttes mearrádusaid, dadjá váldočálli Elisabeth Fjellvang Kristoffersen preassadieđáhusas.
Nuorabut go ovdal
Vaikko našunála logut čájehit lassáneami, de lea okta bealli mii vuorjá Kristoffersena vel eanet.
– Sii geat leat gaskal 25-44 jagi boarrásat, leat vearrámusat. Muhto dán vuoru oaidnit ahte lea leamaš balddihahtti lassáneapmi vuddjiin geat leat 18-24 jagi ja vuollel 18 jagi boarrásat, dadjá son.
Leat measta beali eanet vuolleahkásaččat váidon dán jagi go diibmá. Diibmá ledje 18, dán jagi 31 váidima.
Ahkejoavkkus 18-24 leat rievdan 606:s 678:i
Logut eai muital nuorra vuddjiid loguid Finnmárkku politiijaguovllus.
