Okta guđasiin Tromssas ja Finnmárkkus fuolastuvvet skihpára dahje bearašmiellahttu ovddas go leat juhkan eanet pandemiija áiggi. Organisašuvdna Av-og-til balaha ahte eambbosat leat ožžon alkoholaváttisvuođaid maŋimuš jagi.
Jearahallaniskkadeamis maid Ipsos lea bargan alkoholahoddenorganisašuvnna Av-og-til ovddas dieđihit 17 proseantta Tromssas ja Finnmárkkus ahte leat fuolastuvvon skihpára dahje bearašmiellahttu juhkamis koronaáigodagas. Guhtta proseantta leat fuolastuvvon guoimmis. Katrine Gaustad Pettersen, generálačálli Av-og-til:s oaivvilda ahte logut addet siva fuolastuvvamii.
– Mii diehtit ahte eallin maid leat eallán pandemiija áiggi sáhttá lasihit alkoholaváttisvuođaid. Mii leat isolerejuvvon, bargguhisvuohta lea lassánan ja giddejuvvon olgobáikkit leat dagahan juhkama okto ja árgabeaivvis. Dát leat fáktorat mat sáhttet lasihit riskka oažžut váttisvuođaid alkoholain, dadjá Pettersen.
