-Almmuhus-
-Almmuhus-
-Almmuhus-
OĐĐASATBalahaston Leavnnjas

Balahaston Leavnnjas

-

-

Go son čájehii «THIS IS ME» bihtá Leavnnjas, de son vásihii unohisvuođa.

Guovdageaidnulaš ja beakkán sámi rappar, SlinCraze, dahje Nils Rune Utsi, lea jođus «THIS IS ME» čájáhusain Finnmárkkus.

Dan oktavuođas son vásihii juoidá man ii lean vuordán Leavnnjas, Gaska-Finnmárkkus.

 

Son čállá iežas Facebook-siiddus ná:

«(…) Dat báikkit gos ledjen buot eanemus baleš ovdanbuktit bihtá ja čuojahit sámi musihka ledje Áltá, Hámmárfeasta ja Honnesváhki, muhto doppe gal válduimet bures vuostá. Ja de bođiimet Levdnjii, báiki gos mun jáhkken šaddá somá čuojahit … muhto doppe ii lean nu go jáhkken galggai leat, goit nuoraidskuvllas. Go olmmoš boahtá lávddi ala ja muhtumat balahastojit, de gal lea ­duođai váttisvuohta guottuiguin ja olmmošvieruin dáppe, sávan rávisolbmot oahpahit mánáideaset buorebut dáppe (…)».

 

Šállošan

Leavnna nuoraidskuvlla rektor, Reidun Hesjevik, šálloša sin ohppiid láhttenvuogi.

– Mun bessen gullat teáhterbargiin ášši birra, ja lean maid hupman teáhterhoavddain (red.meark. Beaivváš Sámi Nášunálateáhtera hoavda Rolf Degerlund) ja šállošan go nie dáhpáhuvai, lohká son.

 

Mearkkaiguin balahastán

Ovdal go bihtá čájehedje, de galget oahppit leat ožžon mearkkaid, main čuožžu «Ii givssidit», ja daid galget muhtin oahppit čájáhusa oktavuođas bálkon Slincraze guvlui go lei lávddi alde.

– Juo, dat ledje dakkár mearkkat maid ožžo ovdal konseartta. Daiguin galget balahastán, ja dat lea dagahan ahte Nils Rune (red.meark. Nils Rune Utsi aka SlinCraze) galgá leat hui váivin atnán dáhpáhusa.

– Mun válddán ášši ovdan min skuvllas, ja maid daiguin ohppiiguin geaidda guoská, lohká Hesjevik.

 

SlinCraze lea ge ieš nuoraid skuvllas vásihan givssiduvvot, ja čálii lávlaga mainna šattai dovddusin.

Lávlaga man namma lea «Eallin lea nu váttis», mii lea juste givssideami birra.

 

-Almmuhus-