-Almmuhus-
-Almmuhus-
OĐĐASAT – Baicce nannet fuođar­fabrihka

– Baicce nannet fuođar­fabrihka

-

-

Bergneset fuođarfabrihka lea Felleskjøpet evttohan heaittihit, ja Sámedikki ealáhus- ja kulturlávdegotti jođiheaddji Arild Pettersen Inga oaivvilda dan sáhttit dagahit rašes dilálašvuođa eanadollui ja boazodollui davvin.

Sámedikki ealáhus- ja kulturlávdegoddi lea mannan vahku meannudan Sámedikki cealkámuša jahkásaš eanadoallušiehtadussii. Dan oktavuođas lea Bargiidbellodat váruhan evttohusa ahte fuođarbuvttadeapmi galgá heaittihuvvot Bergneset Felleskjøpas Storsteinnesas, ja čujuha ahte buvttadeami heaittiheapmi sáhttá dagahit dohkketmeahttun rašes dilálašvuođa Davvi-Norgga eanadollui.

– Gearggusvuođa- ja heahtedilálašvuođas ferte leat fuođatháhkanvejolašvuohta Davvi-Norggas, sihke eanadollui ja boazodollui. Mii oaivvildat ahte Bergneset fabrihka nannen lea dárbbašlaš vai fabrihkka ii heaittihuvvo boahtteáiggis, dadjá lávdegotti jođiheaddji  Arild Pettersen Inga (Bb) preassadieđáhusas.

Riidoláivudeaddji doaimmat

Bargiidbellodat evttohii seammás ásahit ovttasbargo- ja gulahallanforuma eanadollui ja boazodollui báikkálaš dásis. Sii sávvet dakkár foruma mas galgá dustet ja meannudit vejolaš riidduid mat čuožžilit daid ealáhusaid gaskka, oktan bargat fáttáin gos sáhttá ovttasbargat ealáhusaid ovdánemiin viidáset. 

–  Boazodoalu ja eanaduolu riidoláivudeaddji doaimmat fertejit joatkašuvvat ja ovdánahttojuvvot. Ovttasbargu lea čoavddus dan guovtti ealáhussii mat galget ovdánit buohtalaga, ja fuolahit min guovllu biebmosihkarvuođa, joatká Inga. 

Oaččui doarjjaga

Evttohusat maid Bargiidbellodat ovdanbuvttii lávdegottis ožžo doarjaga Sámedikki eanetlogus, ja dainna lea Inga ilus. 

– Lea dehálaš ahte mii sáhttit čuožžut ovttas dain áššin main ii leat politihkalaš vuostálasvuohta. Mii galgat bargat servodahkii buorrin, ja dalle lea ilolaš go sáhttit soabadit áššiin mat leat dehálaččat servodahkii, loahpaha  Arild Pettersen Inga (Bb).

-Almmuhus-