– Árbevirolaš sámi osku ja risttalašvuođa gaskavuohta lea dehálaš, lohká vuosttašamanueansa Roald E. Kristiansen.
– Árbevirolaš sámi osku ja risttalašvuođa gaskavuohta lea dehálaš, lohká vuosttašamanueansa Roald E. Kristiansen.
Boahtte vahkku čoagganit 26 studeantta Sámi allaskuvlii oahppat eanet ovdalaš áiggi ja dálá oskkuid ja eallinoainnuid birra Sámis. Eanas studeanttat leat báhpat.
– Oahppu deattuha ovttastusa ovdalaš ja dálá oktavuođaid olis Sámis, ja árbevirolaš sámi oskku ja risttalašvuođa gaskavuohta lea dehálaš, lohká Romssa universitehta oahppoovddasvástideaddji ja vuosttašamanueansa Roald E. Kristiansen.
Geasuheaddji oahppofálaldat
Bismačoahkkima bargi Inge Westly muitala ahte dát oahppu lea buot eanemus geasuheaddji lassioahpuid gaskkas Norgga báhpaide.
– Eai leat ovdal leamaš ná ollu báhpat sámi girkoeallima oahpus, lohká Westly.
Son rámida Romssa universitehta, Sámi allaskuvlla, Davvi girkolaš oahppoguovddáža ja Sámi Girkoráđi ovttasbarggu go leat dahkan vejolažžan dán oahpu čađahit.
Joatkkaoahppu
Oahppu lea joatkkaoahppu «Osku ja eallinoaidnu Sámis» mii čađahuvvui 2008/2009:s, muitala Sámi Girkoráđi váldočálli Tore Johnsen.
– Mii leat gitta 2011 rájes geahččalan gávdnat muhtumiid geat sáhttet joatkit dán deaŧalaš oahpu. Go mis dál leat olles 26 studeantta, de dat duođašta ahte dán ohppui lea dárbu, lohká Johnsen.
Oahppu buktá ođđa perspektiivvaid Sámi osko-, miššuvdna- ja girkohistorjjás. Dehálaš fáttát leat sámi girkuid ovdáneamit, dálá vuoiŋŋalaš árbevierut ja sámi servvodaga deaivvadeapmi stuora servvodagain. Lea Romssa universitehta mii lea oahp váldoovddasvástideaddji. Vuosttaš čoagganeapmi lea Guovdageainnus 28.9.–1.10. Nubbi čoagganeapmi lea Romssas boahtte jagi.
