Luovos heasttat gávpogis, ealgačora márkanguovddážis ja bohccot johtolagas.
Luovos heasttat gávpogis, ealgačora márkanguovddážis ja bohccot johtolagas.
Maŋimuš jándora leat olbmot váldán oktavuođa Davvi-Norgga politiijaiguin go eallit vánddardit sajiin gos eai galggaše leat.
– Ánddanjárgga márkanguovddážii lea ealgačora čoahkkanan, ealggat leat Storgatas ja Narvesen kioska luhtte, dieđihedje Gaska-Hålogalándda politiijat ikte.
Go fuođđolávdegoddi ollii báikái, de ledje ealggat sirdán valáštallanbána lusa. Fuođđolávdegoddi balddihii ealggaid eret čoahkkebáikkis, muhto muhtin čearpmaha fertejedje moddii balddihit ovdal jorggihii meahccái.
Heastat gávpogis
Ikte fuomášedje Álttá politiijat luovos heasttaid Aronjárggas.
– Dáppe leat njeallje luovos heastta. Go politiijain dađibahábut ii leat suohpan mielde, de fertet riŋget eaiggádiidda, leaikkastalle Oarje-Finnmárkku politiijat Twitteris.
Eaiggát vieččai heasttaid stálljii.
Bohccot geainnu alde
Nuorta-Finnmárkku politiijat ges dieđihit odne ahte biilavuoddjit galget várrogasat go leat olu bohccot Mátta-Várjjagis.
– Politiijaide dieđihuvvo ahte leat olu bohccot geainnu alde gaskal Girkonjárgga girdišillju ja Njávdáma. Mii ávžžuhit olbmuid vuodjit várrogasat, lohket politiijat.
