Sihkkarastin dihte buoret hálddašeami Báhčaveaijohkii, álggaha FeFo geatnegahtton oaggunkoarta ja bivdoraporterema finnmárkulaččaide. Oaggunkoarta lea nuvttá buohkaide geat ásset fylkkas.
*/
– Mii álggahit geatnegahtton oaggunkoarta bivdoraporteremiin finnmárkulaččaide, oažžun dihte eanet dieđuid mo mii ieža geavahit gáhppálagaid doppe. Dát guoská earenoamážit dápmohiidda jogas. Mii leat ovdal buođđudan stuorra gođđosajiid dápmohiidda čázádagas, fápmorusttegiid huksema oktavuođas, ja jahkásaččat luoitit 5.000 dápmoha johkii, maiddái oalgečázádagain. Doaibma čađahuvvo buhtadan dihtii Pasvik Kraft váikkuhusaid, lohká Einar J. Asbjørnsen, FeFo meahcceossodaga jođiheaddji.
Oaggunnjuolggadusat rivdet
Seammás rivdet oaggunnjuolggadusat rádječázádagas norgga bealde.
Oaggunnjuolggadusat leat eanas váldon oagguma láhkanjuolggadusain norgga beale oasis Báhčaveaijogas, mat leat mearriduvvon kruvdnaprinsaresolušuvnnas borgemánu 20. beaivvi 1976:s, muhto das leat guokte rievdadusa:
-
Dápmot ráfáiduhttináigi viiddiduvvo, mii mearkkaša áigodagas čakčamánu 15. beaivvi golggotmánu 31. beaivái olles jogas, dát guoská maid deaŧalaš oalgečázádagaide.
-
Unnimus mihttu dápmohiidda loktejuvvo 25 senttes 30 sentii.
*/
Nannet čázádaga dápmotnáli
– Aktiivvalaš hálddašandoaimmat galget nannet čázádaga dápmotnáli, ja dahkat daid rievdadusaid ovttasráđiid báikkálaš geavaheddjiiguin. Vuordit ahte stuorát dápmohat lassánit čázádagas áiggi mielde, mii fas dahká eanet geasuheaddjin oaggut, ja stuorruda gođđodápmohiid logu Báhčaveaijogas», dadjá Asbjørnsen.
.
