Ruobbá orohaga boazodoalli Johnny Mathis Sara ballá ahte soapmásat báhčalit bohccuid vahágahttima dihte, go son vuot gávnnai alddis bohcco mii lei bážasin mannan.
Ruobbá orohaga boazodoalli Johnny Mathis Sara ballá ahte soapmásat báhčalit bohccuid vahágahttima dihte, go son vuot gávnnai alddis bohcco mii lei bážasin mannan.
Dán vahkus disdaga fuomášii Johnny Mathis Sara čearpmaha mii álggi meahttilit ja bázadit, iežas orohagas Ruobbá sullos, Romssa fylkkas. Son jurddašii geažotbeallji čearpmat, mii ii lean bohkoduvvon, leat skibasin.
Su mielas orui buorre čearpmat ja válddii gitta biebmama dihte. Muhto gávnnahii ahte ii oro veara biebmagoahtit, ja nu son de njuovai dan ja de oinnii ahte lea bážasin mannan.
– Čearpmahis lei luođđa mannan čoarbbeali čađa ja čoavjái. Jurdilin ahte gii ná báhčala bohccuid ii leat áigume suoládit, muhto njuolgut vahágahttit olbmuid.
Ballá eanet gávdnat
Sara muitala go lea dáid maŋemus beivviid vuodján ealu, de lea oaidnán eanet bohccuid mat meahttiledje seamma ládje go dat čearpmat.
– Mun balan gávdnat vel eanet bohccuid mat leat bážasin mannan, go oidnen ovtta álddu meahttidii ja manai oktan čearpmahiin. In leat sáhttán guorrat go dáppe lea dál hui gassa muohta.
Vuorkágovva: Ovlla Gaup
Áigu váidit politiijaide
Son lea dieđihan ášši politiijaide, muhto ii leat vel váidán.
– Mun riŋgejin ovttatmano boazopolitiijaide dieđihit báhččon bohcco birra, muhto sii ávžžuhedje váidit ášši Romssa politiijaide vai boahtá oidnosii ahte dáppe leat dákkár váttisvuođat. In leat vel astan váidit ášši, ja jurddašan gal veaháš lea go hal das ávki, muhto boađášii juobe oidnosii ášši, lohká son.
Ovdal dáhpáhuvvan
Son ii loga leat vuosttaš geardde go sin orohagas leat bážas bohccuid gávdnan.
– Mii leat ovdal gávdnan hávllaid bohcco gorudiin go leat njuovvan. Lean diibmá maid viggan váidit, muhto eai boazopolitiijat gal leat fitnan dáppe, lohká Sara.
Ii áiggo sivahallat ovttage
Sara čilge sis lea sullos nággu eananeaiggádiiguin, ahte eai galgga boahtit ealuin lulágeahčai sullo gos leat vuollegis eatnamat, ja unnit muohta.
– Go čakčat boahtá muohta, ja ealát hedjona, de bohtet maid skohtervuoddjit. Lean vuohttán skohteriid doaresbeliid gos ii leat lohpi vuodjit, muhto in láve dain beroštit go eai vuojaš ealu siste.
Son ii hálit sivahallat ovttage sullo olbmuid vuodjit lobiheamet ja báhčalit bohccuid, go lohká dehálažžan doalahit oktavuođaid guovllu mearraolbmuiguin.
– In hálit soapmásiid dušše gieldit vuodjimis, go de navddán daid bahádáhkkin, lohká son.
Ávvir lea geahččalan oažžut oktavuođa boazopolitiijaid jođiheddjiin Inger Anita Øvergårdain, muhto son ii lean olámuttos ságaide odne.
