Muhtin dievdu bážii dávgebissuin muhtin ássanguovllus Álttás disdaga, ja measta deaivvai muhtin olbmo gii lei viehkame lahkosis. Politiijat válde dávgebissu báhččis ja billistedje dan.
– Lei okta olmmoš gii lei viehkame Álttás gii goasii deaivvahalai njullii mii lei mehtera sus eret, muitala Finnmárkku politiijaguovllu operašuvdnajođiheaddji Svein-Erik Jacobsen NTB:i.
Viehkki dieđihii dáhpáhusa politiijaide.
Mieđihii dagu
Son čilge vearju lei bivdodávgi mii geavahuvvo gilvohallamis.
– Mii leat reageren dan sivas go jus deaivvahallá njullii, de sáhttá vaikko jápmit dan dihte, muitala Jacobsen.
Dievdu gii bážii njuola, lea mieđihan dagu.
– Son čuoččuha ahte sus ii leat áigumuš roasmmohuhttit ovttage ja lea mieđiha boasttuvuođa. Son lea dohkkehan ahte sihke dávgi ja bissu galgá billistuvvot, muitala operašuvdnajođiheaddji.
Ii leat vel čielggas makkár reakšuvnna son oažžu. Politiijat leat iskame makkár dilis dávgebissu lea geavahuvvon ovdalaččas.
(©NTB)
