Muhtin Tuiskka guorbmebiila šattai badjel geainnu dollet go busse bođii ovdal olggobealde Kárášjoga Suoma guvlui.
Muhtin Tuiskka guorbmebiila šattai badjel geainnu dollet go busse bođii ovdal olggobealde Kárášjoga Suoma guvlui.
Maŋŋebárgga, guovvamánu ovccát beaivvi gaskabeaiáiggi, vujii muhtin Tuiskka guorbmebiilla badjel geainnu riikageainnu 92 Jámbálesváris Suoma guvlui, birrasii guhtta kilomehtera eret Kárášjogas. Lei jođus Kárášjoga guvlui. Dan botta go gádjo guorbmebiilla, de čoagganii oalle guhkes biilaráidu dan maŋábeallai.
– Dás bođii guorbmebiila, tráilár, ovdal busse. Nubbi bođii ovdal ja guorbmebiila šattai dollet hui olu olgeš beallái. Go dollii olgešbeallái, de ii nagodan fas beassat geainnu ala, bođii geaidnoáiddi vuostá, lohká Kárášjoga Leansmánnekantuvrra operašuvdnajođiheaddji Arvid Næss.
Fitne iskamin
Son lohká dát ii livčče lean politiijaášši oppanassiige, muhto fitne dattetge báikkis.
– Jearaimet leat go biilavuoddjis dáhkádusat ortnegis. Hui dávjá lea go lea olgoriikkalaš vuoján, erenoamážit nuorta-eurohpálaš, de ii leat sis dáhkádus ortnegis. Dalle šaddat mii čuojahit biillaeaiggádii gii ferte sáddet báŋkodáhkádusa ahte sii mákset, ovdal go biilagádjunbiila boahtá. Dás lei buot ortnegis ja danin bođii biilagádjunbiila dakkaviđe, čilge Arvid Næss.
Ieš dáhpáhus ii livčče lean politiijaášši
– Muhto go bođiimet báikái, de oinniimet ahte guorbmebiilla goallosjorri lei geainnu alde, dalle lea váralaš dan ektui, lohká Arvid Næss, iige su mielas lean riikageaidnu 92 nu gárži dákko.
Lei veaháš vuollel nulla gráda, vahca, veaháš borga ja geamádat.
Operašuvdnajođiheaddji Arvid Næss muitala guorbmebiilavuoddji čilgen ahte son šattai nu olgešbeallái dollet go busse bođii ovdal, amas beaškkihit oktii.
– Gádjumin sihke iežaset ja dan biilla. Manai bures sihke olbmuin ja biillain, loahpaha Næss.
