53 proseantta oahpaheddjiin leat ohcan dahje árvvoštallet barggu eará suorgái koronapandemiija geažil, čájehuvvo ođđa iskkadeamis.
Iskkadeapmái, man Respons Analyse lea čađahan Oahppodirektoráhta várás, vástidit eatnašat ahte dovdet badjelmeare bargan, hearkkit njoammumii ja unnán bálkáduvvon liigebarggu dihte mii čuovui pandemiija, čállá VG.
Eambbo go bealli dan 1202 oahpaheaddjis geat serve, lea maŋimuš guovtti jagis ohcan eará bargui (11 proseantta) dahje árvvoštallan sáddet bargoohcama (42 proseantta) eará suorggi bargguide.
85 proseantta dieđihit ahte sii leat bargan olu eambbo (50 proseantta), dahje eambbo (35 proseantta), go eará mánuid maŋŋel go giddejedje skuvllaid njukčamánu 12. beaivvi diimmá geasseluomu rádjái. Eatnašat, 6/10, dieđihit ahte konkrehta ja fysalaš njoammunsuddjendoaibmabijuid dihte skuvllain lea sivva liigebargui.
Dasa lassin vástidit 92 proseantta mánáid- ja joatkkaskuvllaid oahpaheddjiin ahte sii eai oaččo badjeláiggemávssu obanassiige. Nuoraidskuvllaid oahpaheddjiid lohku lea 96 proseantta.
Oahppoministtar Guri Melby (G) dadjá aviisii ahte lea dohkketmeahttun jus oahpaheaddjit eai oaččo buhtaduvvot liigebargguid dihte. Son dadjá ahte buot gielddat ja fylkkasuohkanat leat ožžon čielga dieđu ahte koronaskuvllaid dilálašvuohta bistá oktiibuot beannot jagi vel.
– De ii heive ahte dat máŋga miljárdda mat lea juolluduvvon gielddaide ja fylkkasuohkaniidda, ii geavahuvvo badjeláigái ja sadjásaččaide, dadjá Melby VG aviisii.
(©NTB)
