17 olbmo dušše Norgga luottain jagi golmma vuosttaš mánus. Dat lea guhtta eambbo go seamma áiggi diibmá. Badjel bealli dain geat dušše ledje nuorra olbmot. Njukčamánus dušše guđas johtolagas.
Dan čájeha Stáda geaidnodoaimmahaga gaskaboddosaš geahčadeapmi duššanlihkohisvuođain.
– Diibmá kvartálas ledje erenoamáš vuollegis lihkohisvuođalogut, dadjá luoddadirektevra Ingrid Dahl Hovland preassadieđáhusas.
– Dán jagi oaidnit lassáneami fas ruovttoluotta dan dásis mas leimmet ovdal pandemiija. Dat mii vuorjá eanemusat, lea go nuorat dušše johtolagas. Danne lea midjiide dehálaš addit sidjiide buori vuodjinoahpahusa vai leat ráhkkanan váldit buriid ja sihkkaris válggaid johtolagas. Dasa lassin gaskkustit mii dehálaš dieđuid kampánjaid čađa leahtu ja áicilvuođa birra, dadjá son.
Rogalandas leat leamašan eanemus duššanlihkohisvuođat dán jagi 1. kvartála. Romssas ja Finnmárkkus dušše golmmas johtolatlihkohisvuođain dán jagi vuosttaš mánuid.
1. kvartála statistihkka
2023* 17 duššama
2022* 11 duššama
2021* 14 duššama
2020* 24 duššama
2019* 16 duššama
2018* 16 duššama
2017 18 duššama
* gaskaboddosaš logut
Leage áicil beassážiid
Dál álget beassášbasit. Oallugat leat juo dahje leat vuolgime meahccái. Lea ain dievasdálvi olu guovlluin ja siivu rievddada.
– Mii áigut ain rávvet leat áicilat johtolagas ja muddet leahtu ja vánddardeami siivvu mielde, dadjá luoddadirektevra.