Masá bealli nieiddain gaskal 13–14 jagi leat vásihan ahte muhtin bivdá sin juohkit álásgovaid interneahtas.
43 proseantta nuorain gaskal 13–18 jagi vástidit ahte soames lea jearran sáddešii go dahje juogášii go álásgovaid interneahtas.
Nu boahtá ovdan Mediabearráigeahču 2022 Mánát ja mediat guorahallamis. Boađus lea sullii seamma go guovtti jagi áigi.
Leat eanaš nieiddat geat ožžot dán jearaldaga, ja 13–14 jahkásaččaid searvvis lea 47 proseantta dán vásihan. Seamma ahkeluohkás leat 20 proseantta gánddain ožžon seamma gažaldaga.
– Mu mielas lea vuorjašuhtti ahte apmasat vuortnuhit álásgovaid ná olu nuorra nieiddain, lohká Mediabearráigeahču direktevra Mari Velsand preassadieđáhusas.
Álásgovat lassánit
Diibmá vuostáiválde 44 proseantta nuorain álásgovaid earáin, dát lohku lea badjánan guvttiin proseanttain 2020 rájes.
Eanet nuorat leat maid maŋimuš jagiid sádden alddiineaset álásgovaid earáide. Diibmá sáddejedje 8 proseantta 13–14 jahkásaččain álásgovaid. Guđa jagis lea lohku lassánan viđain proseanttain.
Mađi boarraset nuorat šaddet, dađi eambbosat juhket álásgovaid alddiset. 17–18 jahkásaččain jugii 19 proseantta álásgovaid 2022:s.
Ballet eambbosiid vuovdigoahtit álásgovaid
16 proseantta nieiddain ja guokte proseantta gánddain 13–14 ahkeluohkás muitalit ahte sidjiide leat fállan ruđaid álásgovaid ovddas.
Politiijat duođaštit ahte eambbo mánát leat maŋimuš jagiid vuovdigoahtán govaid dahje filmmaid main ieža leat álás. Dábáleamos lea ahte mánát ieža govvejit dahje filbmejit iežaset ja juhket dáid Snapchat bokte.
– Mii jáhkkit ahte vel eambbosat bohtet boahtteáiggis oastit ja vuovdit govaid ja filmmaid main leat álás mánát, lohká Kripos ossodatjođiheaddji Helge Haugland.
Politiijat ávžžuhit váhnemiid hállat nuoraiguin ja čilget makkár váikkuhusat sáhttet jus vuovdá álásgovaid. Jus láhkarihkkun fuomášuvvo, de berrejit olbmot váldit oktavuođa politiijaiguin.
