Sámediggeráđđi lea juolludan oktiibuot 626 750 kruvnna doarjaga Julev- ja Mátta-Sámi girjjálašvuođaprošeavttaide. Doarjja lea juolluduvvon sámi girjjálašvuođadoarjjaortnega bokte.
Sámediggeráđđi lea ilus go lea sáhttán doarjut Julev- ja Mátta-Sámi girjjálašvuođaprošeavttaid maid ulbmiljoavku leat mánát ja nuorat. Julevsámi lágádus Nálaga Tjállagii lea juolluduvvon 330 750 kruvnna buvttadit ja almmuhit mánáidgirjji «Njoammel ja gidádálvve» man Rakel-Iren Pedersen lea čállán mánáide ahkejoavkkus 3-5. Sissel Horndal galgá govaid dasa sárgut.
– Lea hirbmat stuorra dárbu julevsámegiela girjjiide mat eai leat jorgaluvvon, maiddái mánáide geain eatnigiella lea julevsámegiella. Lean ilus go sáhtán dan doarjut, lohká sámediggeráđđelahttu Maja Kristine Jåma preassadieđáhusas.
Dasa lassin lea Julevsámi lágádus Tjihkkom Almmudahka ožžon 176 000 kruvnna jorgalit «Himlabrand» girjji julevsámegillii ruoŧagielas. Moa Backe Åstot, geas lea boazodoalloduogáš Ruoŧa beale julevsámeguovllus, almmuhii dan girjji 2021:s. Ulbmiljoavku leat nuorra rávisolbmot.
– Lea buorre go jorgaluvvo girji mas lea Julevsámi boazodoallu ja kultuvrra duogážin. Lea erenoamáš dehálaš fáddá, erenoamážit nuoraide, joatká Jåma.
Dasa lassin juolluda ráđđi 120 000 kruvnna Trøndelága fylkkagirjerádjosii lohkat videogirjjiid mánáide máttasámegillii. Jåma muitala ahte Trøndelága fylkkagirjerájus lea ovttasbargan Gïelem nastedh buvttadit eanet máttasámegiel videogirjjiid ja jietnagirjjiid ja sii leat ožžon dasa lea hirbmat stuorra dárbbu ja leat dehálaččat maiddái giellaoahpaheamis ja giellaovdáneamis.
