Sámediggeráđđi doarju Davvi-Håloglándda Kirkens SOS 330.000,- ruvnnuin, mas áigot kártet lea go dárbu fállagoahtit heahtebálvalusaid maiddái sámegillii.
Kirkens SOS heahtebálvalus mii lea rabas birrajándora, lea dehálaš olbmuide váttis dilis ja go dárbbaša soapmása geainna beassá hupmat.
Bálvalus galgá maid leat doaibma mii eastada iešsorbmema. Dál gávdno dat bálvalus dušše dárogillii, čállá Sámediggi preassadieđahusas.
Olbmui gii lea heahtedilis, sáhttá leat dárbbašlaš ahte beassá iežas gilli gulahallat heahtedilis, ja Sámediggi áigu váikkuhit dan ahte mis leat bálvalusat sajis ja sáhttet veahkehit diekkár dilis. Danin lea dát prošeakta hui miellegiddevaš, dadjá sámediggeráđđi Mikkel Eskil Mikkelsen.
Dehálaš ahte bálvalusat leat sámegillii
Sámedikki mielas lea dehálaš ahte dákkár bálvalusat maid gávdnojit sámegielat geavaheddjiide go sis lea dárbu dákkáriidda.
Sámegielagiidda lea álkit hupmat sámegiela veahkkebálvalusain, leaš dál almmolaš dehe priváhta bálvalus.
Giella dehálaš heahtedilis
Erenoamáš dehálaš lea dalle go olmmoš lea heahtedilis.
Buohkat sáhttet vásihit dakkár dillái boahtit go lea dárbu hupmat soapmásiin, ja ahte lea soames gii guldala du.
Dalle lea dehálaš ahte mii beassat hupmat iežamet gillii ja diehtit ahte ipmirduvvot, dadjá sámediggeráđđi preassadieđáhusas.
