Nationálasearvvi njuikunbáddegilvu lea dál álgán.
– Min ulbmil gilvvuin lea movttiidahttit eambbo fysalaš aktivitehtii, eambbo illu ja searvevuohta skuvllain, dadjá álbmotdearvvašvuođa Nationálasearvvi generálačálli, Mina Gerhardsen, preassadieđáhusas.
Mo doaibmá gilvu?
Lea 17. geardde searvi lágida dán riikkaviidosaš gilvvu. Dán jagi bistá gilvu miessemánu 3.-13. beaivái.
Gilvu lea oaivvilduvvon ohppiide 4.-7. cehkiin, ja luohkkát čogget čuoggáid juohke minuhtas man leat njuikon. Juohke beaivvi lea vejolaš njuikut 60 minuhta. Go gilvu lea nohkan, sádde oahpaheaddji bohtosiid Nationálasearvái ja de válljejuvvo nationála vuoiti. Dasa lassin vállje juohke fylkkasearvi vuoiti sin guovlluin.
Sámeskuvllat servet
Badjel 90 000 oahppi miehtá Norgga leat searvan álbmotdearvvašvuođa Nationálasearvvi gilvui. Romssas ja Finnmárkkus leat 2001 oahppi 67 iešguđet skuvllain searvamin. Earret eará leat Kárášjoga skuvla, Romssa sámeskuvla, Gorravári skuvla Álttás ja Deanu sámeskuvla searvan gilvui.
