Nu olu doalut miehtá Guoládatnjárgga Ruošša beale Sámis galget lágiduvvot.
Dan muitala iežaset diehtojuohkinbáikkiid bokte Murmánskka eamiálbmogiid guovddáš.
– Jahkásaččat Guoládatnjárgga gávpogiin ja giliin dollojuvvojit konsearttat, skuvladiimmut sámiid birra, gilvvut, čájáhusat ja olu eará. Visot dat leat Sámi álbmotbeaivvi olis, čállá Murmánskka eamiálbmotguovddáš.
Dat guovddáš lea stáhtaásahus ja koordinere lágidemiid. Lágideamit leat miehtá vahku ja muhtun báikkiin dat álggahuvvojit jo guovvamánu vuosttaš beaivvi.
Levgen, konsearttat ja bargobájit
Lujávri lea guovddáš sámiid ássanbáiki Guoládatnjárggas. Guktot mánáidgárddiin lágidit bargobájiid ja stoahkanbottuid main sámi kultuvra lea guovddážis.
Nu maiddái Lujávrris galget lágiduvvot báikkálaš sámi dánsun- ja lávlunjoavkkuid konsearttat.
Levgenbeaivi lea nu go dábálaččat guovvamánu guđat beaivvi olgobealde Sámi kulturguovddáža.
Sámi kulturguovddáš maiddái lágida veaskogoarrunkurssa.
Borramuš ja duodji
Tuloma báikkis, gos juovlamánu loahpageahčen diibmá rahppui sámi kulturguovddáš guovvamánu njealját beaivvi, lágiduvvo duodječájáhus ávvudan dihtii Ruošša beale duojáriid searvvi «Čeppes sam». Searvi ávvuda go 30 jagi lea leamaš doaimmas.
Kulturguovddáš maiddái lágida duodjebargobájiid. Dasa lassin guossuhuvvo liepma.
