Njukčamánus ožžo 84 priváhta olbmo doarjaga gáhttenárvosaš viesuide. 11,3 miljovnna ruvnno ovddas juhkkojuvvui doarjja Kulturmuitofoanddas.
Njukčamánu 1. beaivvi rájes lea Kulturmuitofoanda meannudan 600 ohcama main oktasaš supmi lea 165 miljovnna ruvnno. Guđe guovllus ohcamat leat boahtán čájeha dan man viidát leat ohcan. Measta buot suohkaniin Norggas leat ohcamat boahtán, ja Romsa ja Finnmárku lea ožžon oktiibuot 708 000 ruvnno. Dan dieđiha Kulturmuitofoanda preassadieđáhusas.
– Prošeavttat mat ožžot doarjaga Kulturmuitofoanddas addet stuora lassiváikkuhusaid báikkálaččat. Vásáhusat čájehit ahte lea leamaš ávkkálaš báikkálaš duojáriidda ja ávdnasiidda. Okta ruvdno Kulturmuitofoanddas lea bealnjealját ruvnno bijus gáhttet kulturmuittuid. Ii dušše nu ahte galget gáhttejuvvot, muhto maiddái nu ahte daid sáhttá geavahit ja deavdit dehálaš funkšuvnnaid boahtteáigái, dadjá Kulturmuitofoandda direktevra Simen Bjørgen Preassadieđáhusas.
Meannudit áššiid dađistaga
Kulturmuitofoanda meannuda ohcamiid dađistaga. Priváhta eaiggádat sáhttet ohcat doarjaga vaikko goas nu ahte besset divvut iežaset gáhttenárvosaš kulturmuittuid. Sáhttet leat viesut, orrunbáikkit, fatnasat, kultureatnamat ja gilvagárderáhkadusat.
225 kulturmuitoprošavtta ožžon doarjaga
Dán rádjái 2020:s lea Kulturmuitofoanda addán 37 170 000 ruvnno oktiibuot 225 kulturmuitoprošektii olles riikkas. Prošeavttat mákset miljovnnas gitta 15 000 ruvdnui, das makkár prošeakta lea.
