Ođđa iskkadeapmi čájeha ahte badjelaš 100 000 norgalačča vudje mannan jagis biillain go ledje juhkan alkohola dahje geavahan eará gárrenmirkkuid.
Johtolatpolitiijaid loguid mielde de lei vuodjin gárrendilis sivvan juohke goalmmát jápminlihkohisvuhtii diibmá.
Norstat lea Codan Forsikring ovddas jearran norgalaččain leat go sii maŋimuš jagis juhkan alkohola dahje geavahan gárrenmirkkuid go leat vuodjimin.
Golbma proseantta vástidit ahte sii leat juhkan alkohola ja vuodján, mii mielddisbuktá ahte leat 126 000 badjelaš 18-jahkásaš olbmo dan dahkan.
Okta proseanta vástida ahte leat geavahan gárrenmirkkuid mii sáhttá váikkuhan sin vuodjimii.
– Golbma proseantta ii oro nu olu, muhto dat lea menddo olu dán oktavuođas. Jus vuodjá gárrendilis, de sáhttá vahágahttit sihke iežas ja earáid, ja mis dáhkádussuorggis lea nolladohkkehus vuodjit gárrendilis, dadjá Codan Forsikring gulahallanjođiheaddji Georg Richvoldsen.
