Norgga beale sámediggepresideanta Aili Keskitalo dollii mannan duorastaga Ruonáeatnamii, movttiidahttit sámi nuoraid AWG dálveriemuin.
Norgga beale sámediggepresideanta Aili Keskitalo dollii mannan duorastaga Ruonáeatnamii, movttiidahttit sámi nuoraid AWG dálveriemuin.
Arctic Winter Games (AWG) – árktalaš dálvegilvvut leat máilmmi stuorámus máŋggabealat valáštallan- ja kulturdáhpáhus árktalaš guovllu nuoraide. Dán jagi lágida Kalaallit Nunaat/Ruonáeana Nuuk gávpogis AWG gilvvuid mat álget dál sotnabeaivvi guđát beaivvi ja bistet gitta bearjadahkii, njukčamánu 11. beaivái. Sámi nuorat oassálastet maid ja Sámi joavkkus leat mielde 45 olbmo, 24 čuoigi, ovcci spábbačiekči, guokte kulturnuora ja logi jođiheaddji ja bohtet Norggas, Suomas ja Ruoŧas.
Ovddit AWG-gilvvuin lea measta šaddan árbevierrun ahte Norgga beale sámediggepresideanta fitná movttiidahttimin sámi nuoraid.
– Mu mielas lea dát measta buot somámus presideantabarggus ahte beasan vuolgit sámi nuoraid mielde árktalaš dálveriemuide. Riemut álget dál sotnabeaivvi Nuukas Kalaallit Nunaatas ja mis leat máŋga sámi nuora, sihke kulturovddasteaddjit, muhto dieđusge sámi nuorra valáštallansearat geat vulget, sihke čuoigit ja spábbačiekčit. Illudan sakka. Galggan moadde beaivvi čuovvut daid riemuid ja sávvamis beasan vásihit sámi medáljaid daid beivviid go mun lean doppe, lohká Norgga beale sámediggepresideanta Aili Keskitalo uksagaskkas mannan duorastaga manadettiin Nuukii Kalaallit Nunaatii movttiidahttit sámi nuoraid.
Gávttehassan ja sámi valáštallin
Sámediggepresideanta Aili Keskitalo muitala son áigu čuovvut mielde kulturdoaluid ja čuoigamiid ja Futsal spábbačiekčamiid maidda sámi nuorat servet.
– Mus lea gákti fárus, muhto somámus lea go mus lea seammalágan Sámi Valáštallanlihtu hárjehallanbiktasat go nuorain leat, čaibmá ieš.
Lohká sus eai leat čuoigangápmagat ja sabehat mielde go joatká viidásut Amerihkkái dan vahkkus. Son soaitá čuoiggastit veaháš jus oažžu luoikkasin sabehiid muhtin oahppásiin.
– Sii soitet munnje luoikat sabehiid, árvala son ja muitala sus ain ge leat viehkanskuovat fárus.
Njeallje tiimma Norgga maŋis
Ruonáeana lea njeallje tiimma Norgga áiggi maŋis. Dat mearkkaša ahte jus Norggas lea tiibmu 12, de lea Ruonáeatnamis tiibmu dušše gávcci.
– Lea njeallje tiimmu erohus dohko ja várra mearkkaša ahte mun lihkan hirbmat árrat. Njeallje tiimma erohus ii leat nu stuorra erohus go logi tiimma erohus Alaskas gos ovddit AWG-riemut lágiduvvojedje. Lei oalle lossat ruovttumátkkis, lohká Aili Keskitalo.
Muitala šaddá somán deaivvadit olu oahppásiiguin Ruonáeatnamis, kulturdoaluide.
– Kulturgállás láve hui somá go buot dat árktalaš guovllu oasseváldit čájehit iežaset kultuvrra, lohká Aili Keskitalo.
AWG dálveriemut
Juohke nuppi jagi lágiduvvojit máilmmi stuorámus máŋggabealat valáštallan- ja kulturdoalut árktalaš guovlluid nuoraide. Doalut bistet birrasii vahkku ja lágiduvvojit juohke nuppi jagi vuoruid mielde. Lágideaddji jorrá vuoruid mielde oassálastiid guovllu dahje riikka mielde. Árktalaš riemut ávvudit valáštallama, gulahallama olbmuid gaskkas ja iešguđet kultuvrraid. Riemuid ulbmil lea fuomášahttit kultuvrralaš iešguđetláganvuođa ja ovdánahttit valáštalliid geat rehálaččat gilvalit gaskaneaset. AWG čatná árktalaš riikkaid oktii ja sisttisdoallá sihke árbevirolaš riemuid nu go Arctic Sports ja Dene Games. Oassálastinriikkat leat: Alaska, Yukon, Northwest Territories , Nunavut, Nunavik, Alberta, Sapmi, Yamal ja Kalaallit Nunaat/Ruonáeana.
Sotnabeaivvi doalut maŋŋonit
Sotnabeaivvi rahpanseremoniija Inussivik dálus galgá álgit tiibmu 12:00 ja bistit guokte tiimmu. Muhto sermitsiaq.ag aviisa dieđiha stoarpma ja dát váikkuha maid AWG-riemuide.
– Mii maŋidat rahpandoaluid tiibmu 20.00:i, iige 12.00 nu mo almmuhuvvon, lohká Arctic Winter Games jođiheaddji, Maliina Abelsen sermitsiaq.ag aviisii.
