-Almmuhus-
-Almmuhus-
VALÁŠTALLAN– AWG dehálaš mihttu 

– AWG dehálaš mihttu 

-

-

Go nuorat deaivvadedje sámemeašttirgilvvuin mannan vahkkoloahpa, de lei ulbmil kvalifiseret boahtte jagi Árktalaš dálveriemuide.

Mannan vahkkoloahpa lágidii Fjell skilag sámemeašttirgilvvuid Skániin. 

Boazovázzingilvvuin ja gilvočuoigamiin ledje badjel 60 oasseváldi. 

Čuoigamat ledje erenomáš dehálaččat gaskal 13-ja 18-jahkásaš nuoraide go sámemeašttirgilvvuin bidjet vuođu kvalifiseret iežaset boahtte jagi Árktalaš dálveriemuide (AWG). 

– Nuoraide lea hirbmat dehálaš beassat ovddastit Sámi AWG gilvvuin. Doppe besset vásihit eará álgoálbmot kultuvrraid ja oahpásmuvvat ođđa olbmuide, dadjá Fjell skilag ja sámemeašttirgilvvuid čuoiganovddasvástideaddji Leif-Roar Mikkelsen. 

Sámemeašttirgilvvuid bohtosiid oainnát dás

Govvagallerija oainnát vuolimusas dán áššis. 

 

Vásáhus


2016 AWG rahpandilálašvuohta. Vuorkágovva: Sámi valáštallanlihttu

Oktiibuot vállje Sámi valáštallanlihttu 24 sámi nuora geat besset vuolgit Kanadai gilvvohallat AWG:s. 

– AWG:s leat golbma čuoiganjoavkku ja juohke jovkui besset njeallje nieidda ja njeallje gándda. Maŋŋel sámemeašttirgilvvuid evttohit mii 5-6 oasseváldi juohke jovkui. Dát nuorat galget de čuovvut sihke geasse- ja dálvečoahkkanemiid ovdal go sierra lávdegoddi vállje dan 24 nuora geat besset vuolgit AWG:i mii lágiduvvo njukčamánus boahtte jagi, čilge Mikkelsen ja dadjá dán erenomáš vásáhussan nuoraide. 

– AWG-gilvvut leat máilmmi stuorrát ja rahpandilálašvuođa sáhttá buohtastahttit Olympiagilvvuid rahpamiin. Dat sáddejuvvo njuolgga Kanada TV-kanálas, gilvvuin leat 2000 oasseváldi ja hirbmat olu geahččit. Sámi nuorat lávejit loaktit erenomáš bures. Dat lea vásáhus maid muitet agibeaivve, dadjá son. 

 

Skánit nuorat TV:s

Fjell skilagas leat huššabeaivvit. Maŋŋel sámemeašttirgilvvuid lágideami galget oainnat čalmmustahttit sámi kultuvrra Reistadčuoigamiin mat lágiduvvojit dán vahkkoloahpa. 

Reistadčuoigamat leat internašunála gilvvut gos oasseváldit čuiget Siellagis Beardogoržái. 

– Čuoigamat sáddejuvvojit TV:s, muhto muhtin gaskkas ii leat gulahallan ja dalle leat hutkan čájehit eará gilvvuid, namalassii boazovázzingilvvuid mat maiddái leat oassin sámemeašttirgilvvuin. Guđas Fjell skilagas oasálastet ja galget oanehis veršuvnna čájehit boazovázzingilvvu mas oasseváldit čuiget ja njorostallet, lohká Fjell skilag ovddasvástideaddji Leif-Roar Mikkelsen, gii dadjá dán dehálažžan sidjiide. 

– Dat lea stuora vásáhus midjiide ja lea maid erenomáš somá go Reistadčuoigamiid lágideaddjit háliidit čalmmustahttit sámi kultuvrra. Mii cegget lávu gos málestit ja čađahit boazovázzingilvvuid. Mii sávvat ahte dát šaddá jahkásaš dáhpáhus, ja jus nu gártá, de fertet árvvoštallat galggašii go Sámi valáštallanlihttu dan lágidit vai maiddái eará sámi čuoigit beasaše čájehit čehppodagaset, lohká son. 

 

Lihkostuvve bures 

Boazovázzingilvvut leat árbevirolaš gilvvut sámi valáštallamis ja Mikkelsen oaivvilda ahte oasseváldit leat ovdánan das. 

– Sámemeašttirgilvvuin vásiheimmet ahte nuoramus čuoigit ledje erenomáš bures hárjehallan njorostallat. Máŋggas deive buot viđa njoarosteamis, nu ahte dássi lea sakka buorránan ja dat lea hirbmat positiiva, dadjá son ja muitala ahte gilvvut lihkostuvve bures mannan vahkkoloahpa. 

– Leimmet hirbmat lihkkoš dálkki dáfus. Dáppe borggai ja arvvii sihke ovdal ja maŋŋel gilvvuid, muhto guktot beivviid lei beanta fiertu gilvvohaladettiin. Sotnabeaivvi gal lei jo erenomáš fiertu ja de gal badjánii beassášdovdu. Muđui leat ožžon olu buriid ruovttoluottadieđuid oasseváldiin, loahpaha Fjell skilag ovddasteaddji ja čuoigamiid ovddasvástideaddji Leif-Roar Mikkelsen. 


IL Ilar čuoigi Julius Riel-Saua njoarosta boazovázzingilvvuin. Son lea maid mielde AẈG kvalifiseremis.  Govven: Charles Petterson

-Almmuhus-