Sihke sotnabeaivvi ja mánnodaga borggai máŋgga báikkiin Davvi-Norggas. Ollu luottaide lea muohttán dál, nu go oaidnit Áisároaivvis.
Sihke sotnabeaivvi ja mánnodaga borggai máŋgga báikkiin Davvi-Norggas. Ollu luottaide lea muohttán dál, nu go oaidnit Áisároaivvis.
– Jus áiggut vuodjit biillain, de fertet árvvoštallat molsut geassedeahkaid eret ja bidjat dálvedeahkaid biilii. Davvin lea jo leamaš lihkohisvuohta dálvesiivvu dihte, ja leat ollugat geat eai leat ráhkkanan dasa. Eisseválddit leat maid ávžžuhan bidjat dálvedeahkaid jus sáhttá muohttit luottain gos vánddardat, lohká Tryg Forsikring kommunikašuvdnaráđđeaddi Torbjørn Brandeggen.
Čuovo dálkedieđu
Meteorologat leat sádden váruhusa olles Norggas go sáhttá leat njalkkas dál. Nordlánddas, Romssas ja Finnmárkkus sáhttá geavahit biikadeahkaid golggotmánu 15. beaivvi rájes, ja muđuid Norggas skábmamánu 1. beaivvi rájes.
– Muhto, ferte čuovvut dálkki ja dan mielde bidjat deahkaid. Eatnasiidda davvin sáhttá leat buoremus dál molsut deahkaid, go dálkediehtu dán vahkku čájeha borggaid. Láhkaásahusas čuožžu ahte lea lohpi geavahit biikadeahkaid ovdal mearriduvvon dáhtoniid jus orru siivu gáibideame dan, lohká son.
Brandeggen muittuha maid ahte deahkka lea varasgálvu, ja jus deahkat leat boarráseappot go golbma jagi, de ávžžuhuvvo molsut daid.
Deahkkagáibádusat dálvet
Geassedeahkaid ii galgga geavahit go lea dálvesiivu (muohta ja jiekŋa). Deahkain galgá leat unnimusat 3 millimehtera minsttarčikŋodat gaskal skábmamánu 1. beaivvi ja mánnodaga maŋŋel nuppi beassášbeaivvi.
Dálvet ii leat gáibádus biikadeahkaide.
Biikkat sáhttet leat dušše dálvedeahkain (earret go mohtorsihkkeliin).
Vuojánis, mas lea deaddu vuollel 3500 kilo, fertejit leat biikkat buot deahkain jus válljet biikadeahkaid.
Ollu politiijaguovllut ávžžuhedje mánnodaga molsut deahkaid nu jođánit go vejolaš. Jus it leat sihkar makkár siivu lea doppe gosa leat manname, de sáhtát iskat dieđuid Vegtrafikksentralenis. Neahtas sáhtát maid iskat siivvu muhtin luottain gos Stáda geaidnodoaimmahagas lea kámera.
