Hirbmat divrras elrávdnjehattiid dihtii leat olu fitnodagat geahpedan lieggasa bargosajis. Bargobearráigeahčču ávžžuha jođiheaddjiid gulahallat bargiiguin man liekkas sin mielas galggašii leat bargosajis.
– Bargobirasláhka ii loga maidege temperatuvrra birra, muhto Bargobearráigeahčču rávve ahte ii galgga geahpedit temperatuvrra vuollil 19°C bargosajiin nu go kantuvrrain, skuvllain, mánáidgárddiin ja bargosajiin gos ii leat lossa bargu, lohká Bargobearráigeahčču ossodathoavda Gunn Robstad Andersen preassadieđáhusas.
Gulahallan dehálaš
Temperatuvra váikkuha bargosaji loaktimii, dearvvašvuhtii ja buvttadeapmái. Jus lea menddo čoaskkis lanjas, de sáhttá dat čuohcat bargui. Go olmmoš goallu, de eai doaimma suorpmat nu mo galget, ii leat nu dárkil ja njoazida barggu. Sáhttá maid váikkuhit olbmo dehkiide ja dearvvašvuhtii. Vuogas bargoliekkas molsašuddá olbmos olbmui. Danin berre bargoaddi hállat olbmuiguin ovdal go geahpeda lieggasa.
Bargobearráigeahčču cealká ahte buriin gulahallamiin sáhttá čoavdit hástalusaid.
Naba sii geat gollot?
Jus goallu barggus, de ávžžuha bargobearráigeahčču gulahallat bargoaddiin ja lagamus jođiheddjiin.
– Huma bargoaddiin váttisvuođa birra, ja áinnas evttot čovdosiid. Molssaeaktu lea mannat suodjalanáittardeddjiin dahje bargobiraslávdegottiin. Jus váttisvuođat eai čoavdás eará ládje, de sáhtát maid váldit oktavuođa minguin Bargobearráigeahčus, dadjá Robstad Andersen.
