Sápmi art stipeanddat galget juhkkojuvvot Johkamohki márkániin guovvamánus 2019:s. Dál ávžžuhit sii dáiddáriid sáddet ohcamiid stipeanddaide.
Sápmi art stipeanddat juhkkojuvvojit dáiddáriidda Suomas, Norggas ja Ruoŧas.
Stipeanddaid ulbmil lea movttiidahttit ja čalmmustahttit dáiddačehpiid iešguđet dáiddasurggiin nugo govven ja hábmen, duodji ja giehtadáidu ja musihkka.
Mihttun lea maid váikkuhit sámi kultuvrra beaggimii.
Lea nubbi jahki go dát stipeanddat juhkkojuvvojit.
Insamlingsstiftelsen Team Lapland
Lea Insamlingsstiftelsen Team Lapland, Johkamohkis, mii lea álggahan stipeandaortnega ja sii mearridit ja juhket stipeanddaid.
Oktiibuot juhkkojuvvo 2019:s 75 000 ruoŧaruvnno, mat fas juhkkojuvvojit viđa stipendiáhtaide.
Okta oažžu 25 000 SEK, guovttis oažžuba 15 000 SEK ja guovttis fas 10 000 SEK.
Ávžžuhit dáiddáriid ohcat
Dál ávžžuha Insamlingsstiftelsen Team Lapland preassadieđáhusas sámi dáiddáriid ohcat stipeanddaid.
Maŋemuš ohcanbeaivi lea 31.12.2018 ja ohcanskovi gávdná sin neahttasiiddus.