Okta tráilar Leaibevuonas lea čeassan doaresbeallái go lea nu gálja.
Finnmárkku politiijaguovlu dieđiha ovtta tráilara leat čeassan doaresbeallái E-6 geainnus Leaibevuonas Skáiddi guvlui. Politiijat dieđihit ahte báikkis lea issoras gálja.
– Ávžžuhit biilavuddjiid vuodjit várrogasat. Dál leat botkkuhan sádduid báikkis, dieđiha Finnmárkku politiijaguovlu Twittera bokte.
Gálja geainnut
Stáhta geaidnodoaimmahaga luoddajohtolatguovddáš dieđihit sii leat ožžon dieđuid ahte leat viehka gálja geainnut muhtin guovlluin Finnmárkkus.
– Dál ii leat vel leamaš vel albma dálvi máŋgga báikkis Finnmárkkus, go lea veaháš galmmas ja fas bivalda ja arvváska, de jiekŋu geaidnu. Dat lea dat mii lea geavvan Leaibevuonas, dadjá Dag Kristiansen luoddajohtolatguovddážis Musseres.
Guovllut gos son namuha leat ožžon dieđu ahte leat gálja geainnut leat gaskal Leavnnja ja Leaibevuona, gaskal Kárášjoga ja Deanušalddi.
Lea maid dieđihuvvon ahte lea gálja Deanušalddis viidáset Juovlavutnii ja Deanodahkii.
