-Almmuhus-
OĐĐASATÁvžžuha olusiid searvat vai lea deaddu

Ávžžuha olusiid searvat vai lea deaddu

-

-

Dán mánu lea gulaskuddančoahkkin duohtavuođakommišuvnna dáruiduhttima birra Stuorradikkis. Sámediggeráđđelahttu ávžžuha sámi servviid ja ásahusaid searvat čoahkkimii vai máŋggabealatvuohta boahtá dál juo ovdan.

Stuorradikki bearráigeahččan- ja konstitušuvdnalávdegottis lea rabas gulaskuddan sámi ja kvena duohtavuođakommišuvnna birra miessemánu 15. beaivvi.

Sámediggeráđđelahttu Inger Eline Eriksen Fjellgren (Árja) ávžžuha servviid, ásahusaid, báikegottiid ja olbmuid searvat gulaskuddančoahkkimii. Son lohká de maid gártat stuorát deattu.

– Nu oallugat go vejolaš galggaše boahtit muitalit manne lea dárbu dákkár almmolaš guorahallama čađahit dáruiduhttima ja dan váikkuhusaid birra. Vásáhusat leat iešguđetláganat Sámis, ovdamearkka dihte Sis-Finnmárkkus ja riddoguovlluin. Mii háliidit ahte gulaskuddančoahkkimis galgá máŋggabealatvuohta áššis gullot, lohká sámediggeráđđelahttu.

Videos man Sámedikki gulahallanossodaga hoavda, Jan Roger Østby, lea almmuhan Facebookii, ávžžuha sámediggeráđđi olbmuid boahtit Stuorradiggái. Video oainnát bajimusas.

 

– Stuora váikkuhanvejolašvuohta

Inger Eline Eriksen Fjellgren ovddasta Sámediggeráđi čoahkkimis. Maiddái Sámi Girkoráđđi ja Norgga Kvenaid Searvi leat dieđihan searvat.

Eriksen Fjellgren lasiha ahte ipmirda go eaŋkilolbmot eai soaitte sáhttit searvat, ja danne leat váldán oktavuođa iešguđetlágan servviiguin ja ásahusaiguin.

– Mis lea stuora váikkuhanvejolašvuohta. Mii beassat ieža vuolgit muitalit ja sávvamis Stuoradiggi oaidná dárbbu dákkár kommišuvdnii. Dá lea easkka vuosttaš lávki, ja jus Stuoradiggi mearrida ásahit guorahallama, de fertejit Sámediggi ja sámi ásahusat váikkuhit maid galgá guorahallat ja man viidát. Dat han galgá min eavttuid mielde, go dá lea min historjá, lohká Inger Eline Eriksen Fjellgren.

 

Sámediggi ja Ráđđehus ovttaoaivilis

Eriksen Fjellgren lohká Sámediggi ja Ráđđehus leat rievtti mielde ovttaoaivilis dán áššis.

– Ráđđehus lea dadjan eai oainne dárbbu kommišuvdnii, muhto ahte lea dárbu geahčadit historjjálaš beali. Mii leat ovtta oainnus ahte lea dárbu dákkár guorahallamii. Ii ge leat dárbu mearridit manin dan galgá gohčodit, muhto dehálaš dákkár guorahallama oažžut.

Sámediggeráđđelahttu lohká go guorahallan lea čađahuvvon, de lea lunddolaš geahčadit maid ferte ráđđehusa ja Stuoradikki bealis dahkat divvut ja njulget dili.

– Dál vásihit ahte eai ádde manne Sámediggi dárbbaša ruđa, dávjá bušeahta oktavuođas eai váldde vuhtii gáibádusaid. Sámedikki bušeahtta ii leat lassánan máŋgga jahkái, ja dat čájeha eai ádde dárbbuid mat leat sámi servodagas, lohká Eriksen Fjellgren.

 

– Stuoradiggi rievttes vuolggaheaddji

Kirsti Bergstø ja Torgeir Knag Fylkesnes Sosialisttalaš gurutbellodagas leaba ovddidan evttohusa.

– Lea dehálaš ahte kommišuvnnas lea fágalaš deaddu, man Sámediggi ja Norgga Kvenaid Searvi leat dohkkehan. Kommišuvdna ferte oažžut dan áiggi ja daid resurssaid maid dárbbašit vai nagodit doaimmahit buori barggu, čuožžu ovddastusevttohusas.

 Evttohusas čálliba ahte lea áigi Stuoradikkis čuovvolit dán ášši. Sudno mielas lea lunddolaš ahte lea Stuoradiggi mii dan dahká.

– Stuoradiggi lea álbmoga ovddasteaddji, ja guoddá olles riikka ovddasvástádusa. Danne berre Stuoradiggi vuolggahit dan barggu.

Sudno evttohus lea ahte Stuoradiggi bivdá presideantagotti dahkat dárbbašlaš ráhkkanemiid vai Stuoradiggi sáhttá álggahit guorahallankommišuvnna, mii galgá leahkit duohtavuođakommišuvdna Norgga dáruiduhttinpolitihkas sápmelaččaid ja kvenaid vuostá.

-Almmuhus-