Deanu ráđđealmmái ávžžuha fylkkamánne giddet máđijaid go eana lea nu njuoskkas.
Deanu ráđđealmmái lea ožžon fuolastus dieđuid báikegotteolbmuin ja bearráigeahččoeiseválddiin ahte mohtorjohtolat meahcis dagaha stuorra vahága lundui.
Ávžžuha giddet
Gieldda hálddahusbargit leat maid leamaš geahččamin muhtin geassemáđijaid ja sáhttet duođaštit dan dilálašvuođa máđijain.
Deanu gieldda ráđđealmmái ávžžuha Finnmárkku fylkkamánne gaskaboddasaččat gieldit mohtorjohtolaga máđigain olu guovlluin gielddas.
– Gielddas lea gulahallan fylkkamánniin makkár máđijat sáhttet leat ain rahpasat. Lea erenomážit Badje-Deanus ja vuollegis eatnamis gos lea heajos dilli, dieđiha gielda preassadieđáhusas.
Ávžžuha gielddaid geassit sierravuodjinlobiid
Finnmárkku fylkkamánne ávžžuha gielddaid geassit ruovttoluotta sierravuodjinlobiid mat gusket njuoska luondduguovlluide.
– Dán geasi lea arván olu, ja danin lea dárbu gáržžidit bievlavuodjima. Lea hoahpu dieđaštit dilálašvuođa ja bidjat johtui doaimmaid, čállá fylkkamánne preassadieđáhusas.
Finnmárkku fylkkamánne dáhttu gielddaid sáddet dieđu fylkkamánnii jus lea dárbu giddet máđijaid.
