-Almmuhus-
-Almmuhus-
OĐĐASAT Ávžžuha geahčahit liikki

Ávžžuha geahčahit liikki

-

-

Norggas leat alla logut das man oallugiin fuomášuvvo liikeborasdávda juohke jagi. Liikedoaktárat leat ge ásahan sierra beaivvi mas buohkat sáhttet iskkahit liikki ja eamidielkkuid.

Okta čilgehus Norgga alla loguide,  lea dieđusge go rikkis riikkain lea ollislaš borasdávdaregisttar ja olbmot ellet guhká.  Muhto liikká jápmet ain ollusat liikeborasdávddain Norggas, ja danne leat liikedoaktárat ásahan sierra beaivvi eastadeami dihte. 

Diŋgot diimmu

Miessemánu guđát beaivvi sáhttá juohkehaš geahčahit eamidielkkuid dahje riegádanmearkkaid liikedoaktára luhtte rekvisišuvnna haga.

Dán fálaldahkii galgá diŋgot diimmu, ja lea máŋgga gávpogis Norggas dan beaivvi, earret eará Girkonjárgas, Álttás ja Romssas. Dan čállá Borasdávdasearvi neahttasiidduineaset.

dáppe sáhttá geahčahit liikki:

Áltá

Asker

Bergen

Elverum

Førde

Hárštá

Haugesund (dievva)

Girkonjárga

Kristiansund N

Levanger

Mussere 

Moss

Narviika

Oslo

Rådal

Stavanger

Romsa

Troandin

 

Dievddut healbadit

– Jus galgá ollet doaktára lusa ovdal go borasdávda lea viidánan, ferte diehtit mat leat dávdamearkkat. Dievddut badjel 50 jagi bohtet erenoamáš dávjá beare maŋŋit doaktára lusa, ja das sáhttet issoras váikkuhusat,  dadjá bajitdoavttir Ingrid Roscher Rikshospitalet liikeossodagas. Son lea maid liikeiskanbeaivvi našunála koordináhtor. 

Borasdávdasearvvi váldočálli Anne Lise Ryel ávžžuha olbmuid várjalit liikki beaivvádahkan ja mannat doaktára lusa jus fuomáša ahte liikkis rivdet dielkkut. 

– Lea goit buorre ahte liikeborasdávda lea dakkar borasdávda man diehtit movt galgá eastadit, dadjá Ryel, gii maid rámpo liikedoaktáriid go lágidit dákkár beaivvi. 

30 riikkas

Liikeiskanbeaivi lágiduvvo Euromelanoma oktavuođas, mii lea akšuvdna masa 30 eurohpáriikka servet, ja mas oččodit eambbo fuomášumi dasa movt liikeborasdávdda fuomáša árrat ja movt dan eastadit. 

 

 

 

- Advertisement -
-Almmuhus-