-Almmuhus-
-Almmuhus-
-Almmuhus-
OĐĐASATÁvžžuha buoridit oktavuođa Ruoššain

Ávžžuha buoridit oktavuođa Ruoššain

-

-

Bargiidbellodaga sámediggejoavku moaitá go Norgga ráđđehusas lea galbma oktavuohta min nuorta ránnáin, Ruoššain.

 – Lea ortnegis ráŋggáštit ráđđenvugiid mat rihkkot vuđolaš olmmošvuoigatvuođaid, muhto seammás fertejit stáhtat bisuhit gulahallandilálašvuođaid rabasin, dadjá Bargiidbellodaga parlamentáralaš jođiheaddji Sámedikkis, Vibeke Larsen, preassadieđáhusas.

 

“Olbmos-olbmui” nannet

Bargiidbellodaga sámediggepolitihkkár čállá viidáseappot sii oidnet ahte olbmos olbmui- ovttasbargu  berre ovdánit, ii ge gáržžiduvvot, go dainna lágiin sáhttá čoavdit oktasaš hástalusaid.

 – Vaikko mii aitto ávvudeimmet ahte 70 jagi lea gollan dan rájes go riika šattai friddjan, de orru nu ahte ollugat leat vajálduhttán min ruošša ránná, mii lei mielde friddjavuođa buktime min riikka davimus fylkkaide, vuosttaš eanaguovlu mii oaččui friddjavuođa olles riikkas, cealká Larsen.

 

Ávžžuha sámedikki čalmmustahttit

Son rámpo ovddeš ráđđehusaid go leat gulahallan ruoššaiguin ja olahan guolástussii ovttaoaivilvuođa juohkinlinjjá šiehtadusa dáfus ja maiddái soahpan ráddjet badjelmeare guolásteami Ruošša guovllus. Dan lohká nagodan go našunálastáhtat leat bures ovttasbargan.

 – Mii gudnejahttit Finnmárkku fylkkagieldda ja Mátta-Várjjaga gieldda go dáhttot bisuhit buori ovttasbargovuoiŋŋa min nuorta ránnáin. Sámediggi berre maid čalmmustahttit iežaset lagas ja bures lihkostuvvan ovttasbarggu álgoálbmotorganisašuvnnaiguin Ruošša bealde. Lagas olbmos olbmui-ovttasbarggu bokte leat fárus hukseme dan šaddi demokráhtalaš organisašuvdnaovdáneami mii Guoládatnjárggas lea, dadjá Larsen.

 

 – Ii ávkin jus orusta

Larsen dadjá ahte jus galge Davviguovllu politihkain lihkostuvvat, mii lea okta ráđđehusa áŋgiruššansurggiin, ferte nagodit doallat rabasin gulahallanlinnjáid.

 – Ráđđehus berre iežas olgoriikapolitihkain, normaliseret oktavuođa ránnástáhtain nuortan. Ii leat oktiige ávkin jus orusta dat ovttasbargu, mii lea nu erenoamáš olmmošlaš oktavuođaid dáfus, dadjá Vibeke Larsen.

 

Rahpat rádjestašuvnnaid

Finnmárkku fylkkagielda vuorrástuvvá go ránnjáriikkaid gaskavuohta čoasku. Ikte lei kultuvra- ja johtalusa váldolávdegottis čoahkkin Murmánskkas, gos leat buktán oktasaš cealkámuša.

 – Mii hálidiit bisuhti buriid oktavuođaid maid leat huksen máŋgga čuođi jagi badjel ruošša beale ránnjáiguin. Danne lea dehálaš ahte goappaš beali eiseválddit lahčet dilit vai sáhttá joatkit ovttasbarggu sihke kultuvrras, ealáhusain ja johtalusas, ja nannet ovttasbarggu Barents Euro Arctic doaimmain, mat leat vuođđuduvvon daid prinsihpaid vuođul maid našunalstáhtat leat mearridan “Girkonjárga II julggaštusas”, čállá váldolávdegotti jođiheaddji Remi Strand.

Sin mielas lea buorre gal go riikkat ovttasbarget buoridit geainnu Girkonjárgga ja Murmánskka gaskkas, ja ávžžuhit vel doalahit rádjestašuvnnaid rabasin birra jándora vai beassá vaikko goas rasttidit ráji.

 

-Almmuhus-