Nidaros duopmogirkus čalmmustahtte maid Sámi álbmotbeaivvi. Árabut beaivvis viháhuvvui ođđa sámi álttar, dasto lei ávvuipmilbálvalus gos earret eará Norgga Gonagas Harald lei. Geahča video ja govaid áššis!
*/
Sámi álbmotbeaivvi lei ávvuipmilbálvalus Nidaros duopmogirkus. Ávvuipmilbálvalus lei muitin ja gudnejahttin dihte sápmelaččaid 100-jagi ávvudeami.
Nidaros duopmogirku lea stuora girku, muhto dat lei áibbas dievva. Doppe lei Norgga Gonagas Harald, eará bovdejuvvon guossit, ja muđui searvegoddi.
– Dehálaš eatnigiela geavahit
Sámi Girkoráđđi ja Nidarosa Lulli-Sámi báhppa lágidedje ipmilbálvalusa.
Bisma Helga Haugland Byfuglien sárdnidii ahte juohke olbmui lea dehálaš beassat iežas eatnigiela geavahit. Ipmilbálvalus čađahuvvui ge máŋgga sámegillii, ja maiddái dárogillii.
Ipmilsátni gullui sihke davvisáme-, julevsáme-, lullisáme-, ja nuortalašgillii. Norgga Sámedikki presideanta Vibeke Larsen ja Ruoŧa Sámedikki ságadoalli Tiina Sanila-Aikio logaiga biibbalteavsttaid.
Maiddái musihkkašuoŋat ledje
Lullisápmelaš Maria Mortensson álggahii ipmilbálvalusa lávlumiin. Stuora duopmogirku čuojai čábbát go Sámi Jienat koarra lávllui ovttas Nidaros duopmokoarain. Frode Fjellheim lea čállán ođđa sálmma 100-jagi ávvudeami oktavuođas, ja dan sii lávlo.
Ođđa álttar
Árabut seamma beaivvi viháhuvvui girku ođđa sámi álttar. Áltara lea Lulli-Sámi dáiddár Folke Fjällström duddjon. Álttar lea muoras dahkkon, Kristusfiguvra. Muđui leat Lulli-Sámi minstarat sárgojuvvon murrii. Álttar lea bissovaš oassi girkus dál.
Go ipmilbálvalus nogai, váccii Gonagas Harald ovttas Sámi Girkoráđi jođiheddjiin, Sara Ellen Anne Eirain, áltara geahččamin. Son moddjái, ja orui liikomiin áltarii.
Ipmilbálvalussii ledje olu bovdejuvvon guossit, Sámi ja Norgga almmolaš olbmot. Stáhtaministtár Erna Solberg lei maid Nidarosdomenis.
