Girkonjárggas ávvudit Saviomusea John Savio 120-jagi beaivvi ođđajagimánu 28. ja 29. beivviid.
Bearjadaga ođđajagemánu 28. beaivvi lea 120 jagi áigi dan rájes go Sámi vuosttaš dáiddár John Savio riegádii. Dan oktavuođas lágida Saviomusea ávvudoaluid Savio gudnin.
Doalut álggahuvvojit vázzimiin, go galget vázzit Girkonjárgga márkanšiljus gitta John Savio mánnávuođabáikái. Muđui beasat vásihit joavkolávluma, luođi, dánsuma ja teakstalohkama čállosiin maid John Savio lea čállán.
Saviomusea dieđiha ahte doaluiguin beassá oaidnit makkár olmmoš John Savio lei, ja dáppe ovdanbuktojuvvojit maid bihtát mat eai leat ovdal almmuhuvvon.
Lávlunjoavku Crescendo lea mielde prošeavttas, ja nu leat maid neavttárat ja dánsejeaddjit Samovarteáhteris. Berit Alette Mienna ja Mátta-Várjjat kulturskuvlla musihkkárat maid servet.
Ávvudoalut lágiduvvojit Girkonjárggas bearjadaga ođđajagemánu 28. beaivvi dii. 17:00 – 18:00, ja lávvordaga diibmu 15:00 – 16:00.
