Guovdageainnus dollet njukčamánus stuora kongreassa mas árktalaš álgoálbmogiid biebmoárbevierru galgá loktejuvvot.
Riikkaidgaskasaš boazodoalloguovddáža (ICR) direktevra Anders Oskal lohká sin háliidit loktet árktalaš álgoálbmogiid biebmokultuvrraid, ja dollet vuosttaš biebmokongreassa árktalaš álgoálbmogiidda. Doalut leat njukčamánu 9.-13.beaivvi 2020 Guovdageainnus.
– Dat lea juoga mii ii leat dán rádjai boahtán albmosii bearehaga. Mii háliidit rievdadit dan, ja čájehit ahte lea dehálaš ja mávssolaš kultuvra ja máhttu, dadjá Oskal.
OIlu álbmogat
Álgoálbmogat bohtet sihke Ruoššas, Davviriikkain, Davve-Amerihkás, Alaskas, Ruonáeatnamis, Kiinnás ja Mongolias. Lea jurdda čájehit borramušárbevieru dan rájes go háhká bierggu dahje eará borramušávdnasiid dassážii go lea gárvvis borranládje. Oskal muitala ahte sii galget maid doallat konferánssa, mas ságastallet árbevirolaš máhtu ja dutkamuša birra dán fáttás. Lea sáhka sihke bohcco dahje karibubierggu, ealggabierggu, guliin, lottiin, murjjiin ja eará šattuin ja nu ain.
Ávvudit nuoraid
Oskal lohká duogážin dán kongressii lea árktalaš ráđi prošeakta mas gehččet rievdamiid árktalaš guovlluin ja movt álgoálbmotkultuvrra sáhttá atnit ávkin heiveheamis. Eallu prošeakta lea ges nuoraidprošeakta mas ožžot ovdan árktalaš guovlluid biebmoárbevieruid. Nuorat leat maid vuoitán internašunála bálkkašumi Gourmand Awards iežaset biebmogirjji ovddas diibmá.
– Kongreassa leat oassin dáid nuoraid ávvudeamis go vuite dán bálkkašumi. Ollu boazodolliide lea maid somá máistit eará boazoálbmogiid borramuša. Muhto leat maid olu seammáláganvuođat, nugo ahte leat álkis buvttadandilálašvuođat ja unnán lasáhusat. Seammás lea nu máilmmi ollu máhttu das movt gieđahallat borramušaid buot dásiin gitta borrama rádjai, dadjá Oskal.
Loktet árvvu árktalaš biebmoráhkadeamis
Su mielas lea maid hui dehálaš loktet árvvu álgoálbmogiid iežaset borramušárbevieruin.
– Davviálbmogat eai čiehkát máisttabovssaid duohkái. Sii dihtet movt bargat biepmuiguin vai šaddá buoremus boađus. Vuoššan leage vuohki mii lea doloža rájes leamaš hui dábálaš árktalaš álbmogiin. Ja manne galgá dat leat boastut, go earát han vigget muitalit ahte galgá bassit buoremus dehkiid. Gii diehtá buoremusat movt bohccobierggu galgá ráhkadit, eará go boazoálbmogat ieža. In oaivvil ii galgga ođasmahttit muhto de berre máhttit iežas dáidaga álggos. dadjá Oskal ja lasiha ahte dán kongressii sáhttet earát nai searvat geat háliidit.
