Davvi-Romssa joatkkaskuvllas lea ihttin 40-jagi ávvudeapmi, dasa lassin illudit go sin skuvllas čađahit eambbosat joatkkaskuvlla go eará guovlluin Norggas.
Davvi-Romssa joatkkaskuvllas lea ihttin 40-jagi ávvudeapmi, dasa lassin illudit go sin skuvllas čađahit eambbosat joatkkaskuvlla go eará guovlluin Norggas.
40 jagi leat vássán dan rájes go Ráisii ja Skiervái ásahuvvo joatkkaskuvllat, muhtin jagiid áigi ovttastuvaiga skuvllat Davvi-Romssa joatkkaskuvlan. Ihttin ávvudit dálá ja ovddeš oahpaheaddjit, oahppit, bargit ja guossit skuvlla 40 jagi beaivvi. Rektor Olaug Bergset lohká skuvllas mearkkašumi olles Davvi-Romsii.
– Mis leat fálaldagat mat heivejit masá buot nuoraide guovllus, dasa lassin geasuhit ohppiid sihke Finnmárkkus ja davimus-Nordlánddas. Lea erenomážit čuoiganoahppu mii geasuha eará guovllu nuoraid, dasa lassin bohtet oallugat sis-Finnmárkkus go mis lea buorre sámegiel fálaldat skuvllas, lohká son.
Eanemus sámegiel oahppit
Davvi-Romssa joatkkaskuvllas leat 340 oahppu ja skuvla lea sámegiel resursaskuvla. Sii fállet sámegiel oahpahusa iežaset ohppiide, sis lea gáiddusoahpahus eará guovllu ohppiide ja dasa lassin láigohit oahpaheddjiid báikkálaš vuođđoskuvllaide.
– Mun láven čuoččuhit ahte min skuvllas leat eanemus sámegiel oahppit, dán jagi leat mis sullii 35 sámegiel oahppi iežamet skuvllas ja sin lassin fállat vel sullii 60 oahppái gáiddusoahpahusa sámegielas, rápmo Bergset.
Fuomášit sámi duogáža
Rektor muitala ahte sámegiella lea hui bivnnut muhtin jagiid, ja stuora beroštupmi han čájeha ahte Davvi-Romssas gávdnojit ruovttut gos sámástit.
– Midjiide lea hui dehálaš fállat buori sámegiel fálaldaga. Oallugat oahpahallet sámegiela maiddái amasgiellan, ja vaikke sii eai soaitte oahppat giela nu bures, de fuomášit iežaset sámi ruohttasiid. Sii oahpásmuvvet sámi kultuvrii ja dát nanne sin identitehta, lohká son.
80 proseantta čađahit oahpu
Davvi-Romssa joatkkaskuvllas eai ávvut dušše skuvlla 40-jagi beaivvi, muhto doppe illudit sakka go badjelaš 80 proseantta ohppiin čađahit joatkkaskuvllaoahpu.
– Min skuvllas eai heaitte seamma oallugat go eará joatkkaskuvllain. Dáinna čevllohalan, ja mu mielas lea hui somá go leat lihkostuvvan. Mii leat diehttelasat garrasit bargan olahit dáid bohtosiid, čilge Bergset. Norggas leat olu nuorat geat heitet joatkkaskuvllas gaskan, olu skuvllain leat bidjan sierra doaibmabijuid vai hehttešedje dán.
Hávvarrievdnesuohkat doalaha nuoraid skuvllas
Davvi-Romssa joatkkaskuvllas čađahit dakkaviđe ságastallamiid jus oahppit jávkagohtet oahpahusas, dasa lassin lea sis lagas ovttasbargu ruovttuiguin.
– Mii guossohit maiddái nuvttá hávvarrievdnesuohkada ohppiide iđitborramuššan. Dáinna leat lihkostuvvan hui bures. Dá lei álggos dušše geahččalanortnet, muhto go oinniimet ahte dušše Ráissas borre sullii 100 nuora iđitbiepmu, de mearrideimmet joatkit dáinna doaibmabijuin, čilge rektor Olaug Bergset.
Báikkálaččat čađahit
Joatkkaskuvllaid fitnofágain ožžot oahppit dábálaččat fágareivve maŋŋel go leat skuvllas gazzan guokte jagi oahpahusa ja čađahan guokte jagi bargohárjehallama. Davvi-Romssa joatkkaskuvllas leat čuovvugoahtán modealla mas dearvvašvuođasuorggi oahppit váldet fágareivve golmma jagis, sii čađahit skuvlla ja bargohárjehallama oktanaga.
– Dát mielddisbuktá ahte eambbosat válljejit dán suorggi ja ohppiid čuovvoleapmi lea sakka buorebut go eará surggiin. Nubbi eará doaibmabidju lea ges diktit ovtta ja seamma ossodatjođiheaddji čuovvut ohppiid álggus gitta lohppii, dát ortnet lea mis valáštallansuorggis. Dasa lassin oaidnit ahte báikkálaš skuvllat leat hui dehálačča nuoraide, mii vásihit ahte Skiervvá ja Ráissa nuorat leat čeahpimusat čađahit oahpu, čilge Bergset.
