-Almmuhus-
MAGASIIDNAÁvvudit 10 jagi beaivvi ovttas sátnejođiheddjiin

Ávvudit 10 jagi beaivvi ovttas sátnejođiheddjiin

-

-

ÁVVUDIT: Tuvrrahasat leat logi jagi juo lágidan feara makkár tuvrraid. Dá leat govvejuvvon 2012:s go ledje meahccevázzintuvrras.

Vuorkágovva/govven Åsa-Márgget Holm

 

Logi jagi das ovdal ledje moadde guovdageaidnulačča geat háliidedje eanet vázzit ja oaidnit ođđa guovlluid luonddus, ja nu ásahuvvui ge Tuvrrahasat, Guovdageidnui tuvrajoavku. Dál ávvudit logi jagi beaivvi.  

 

Idjadit olgun

– Mánát álget ávvodoaluiguin juo lávvordaga. Čakčamánu vuosttaš beaivvis nuppi beaivái «idjada olles Norga» olgun, ja nu dahket maid Guovdageaidnu-mánát. Norsk friluftsliv lágida «friluftlivets uke», ja oassi das lea #nattinaturen.

Lávvordaga vulget mánát váhnemiiguin Fárppaljávrái.

Doppe áigot cegget lávu, oaggut ja oahppat ráhkadit oaggunbovssa.

Eahkes lágidit gállolámpá-stohkosa ja eará stoahkamiid. Anne Gro Gaup ja Sara-Anne Gaup leaba ofelaččat idjadanmátkkis, muitala Tuvrrahasat searvvi jođiheaddji, Sara Victoria Lerberg.

 

Sátnejođiheaddji bovde vázzit mielde

Finnmárkku olggostallaráđđi ja Guovdageainnu suohkan leat maid mielde čalmmustahttime Tuvrrahasaid logi jagi ávvodoaluid.
Sotnabeaivvi bovdeba sátnejođiheaddji Johan Vasara ja Tuvrrahasaid Anne Marit Triumf oktasaš vázzimii Fárppaljávrái.

Vuolgga lea diibmu 13, biilabisánanbáikkis Suohpatjávrri lahka.

Fárppaljávregáddái lea ceggejuvvon ođđa goavdi, ja dan rahpet maid almmolaččat ávvudoaluin.

Goavddi lea Seastinbáŋku1 Davvi-Norga ruđalaččat dorjon.
– Dollagáttis beassat ságastit sátnejođiheddjiin, gii guossuha gáfe ja gáhkuid ávvogussiide, lohpidit lágideaddjit ja lasihit vel ahte sii leat ožžon mielde Terje Aho, ja de gal soitet dollagáttis vel lávllastit ja juoiggastit ge, lohká Sara Victoria Lerberg.

 

– Geahčat ovddasguvlui

– Dan logi jagis mis leat leamašan feara makkár tuvrrat. Mii leat vázzán, mellon, sihkkelastán ja čuoigan. Mii leat vázzán earret eará Ráisii, Návutnii, ja Suomas. Dál háliidit gullat olbmuin guđe guovlluide mii galggašeimmet lágidit tuvrraid boahtteáiggis, muitala Lerberg.

– Ávvodoaluin mii vuorbádit 10-jagi ávvogohpuid miellahtuid gaskkas, seammás go leat eará gilvvut maid. Muhto buot dehálaččat lea, nu go álo, ahte mii leat olgun, luonddus, ja návddašit min fiinna guovllu. Searvva fal don ge! ávžžuha Sara Victoria Lerberg vel.

 

-Almmuhus-