Dán vahkkoloahpa leat Førjulsturnering-čiekčamat Kárášjogas. Ávviris leat njuolggosáddagat doppe.
Dán vahkkoloahpa lágiduvvojit Førjulsturnering-čiekčamat Kárášjogas, ja Ávvir galgá čájehit buot čiekčamiid njuolggosáddagis. Ávvira hárjehalli Elen Marianne Utsi, Biret Alice Utsi ja Ávvira doaibmaossodaga jođiheaddji Per Christian Biti doaimmahit sáddaga.
– Leat mii golmmas geat doaimmahit sáddaga, ja vel bohtet nuorat geat galget veahkkin filbmet. Mis leaba Alice Balto ja Jens Åge Holmestrand, geat galgaba leat kommentáhtorat, muitalii Biti bearjadaga. Alice Balto lea Ávvira journalista, ja Jens Åge Holmestrand ovddeš spábbačiekči.
Dá lea nuppes oanehis áiggis go Ávviris lea njuolggosátta spábbačiekčamiin. Ovddit háve lei Ávvir Cup, mii lágiduvvui skábmamánus. Doppe vásihedje veaháš teknihkalaš váttisvuođaid, muhto Biti ii loga sáhttit lohpidit ahte eai čuožžil fas váttisvuođat.
– Teknihkalaš váttisvuođat gal sáhttet čuožžilit, go mii eat leat dan dahkan ovdal. Dá lea vuosttaš geardde go Altapostena teknihkalaš veahki haga sáddet, dadjá Biti ja dieđihii bearjadaga ahte sátta álgá sullii diibmu 17:45.
