– Lea leamaš ávki vuoruhit digitála buktagiid, dadjá Ávvira redaktevra Kari Lisbeth Hermansen.
Vuosttaš jahkebealis 2024:s ledje Ávviris 1422 diŋgojeaddji, mii lea 84 eanet go diibmá seamma áigodaga.
Dat logut čájehit galle sierra diŋgojeaddji dahje oasti leat báberaviissas, neahtas dahje luovos aviissaid vuovdimis gaskamearálaččat vássán jahkebealis.
Smávva olahusaid olaha
Ávvira redaktevra Kari Lisbeth Hermansen ii loga Ávvira vuosttaš geardde olahan logu badjel 1400.
– Mii leat hui ilus go nagodeimmet beassat dan logu bajábeallái, go dat lea veaháš mihttun mis. Obbalaš mihttu gal lea badjelis, muhto ferte smávva olahusaid bidjat dan stuora mihtu guvlui, dadjá Hermansen.
Hermansen lohká dainna oaidnit ahte Ávvira bargu manná buori guvlui.
– Mun jáhkán gudni galgá mannat min doaimmahussii. Lea dehálaš ahte nagoda doallat dássedis doaimmahusa vai nagodit buvttadit buriid áššiid. Jáhkán maid lea hui buorre go min doaimmahusas leat bargit iešguđet agis. Mis leat sihke nuorat ja boarráseappot geain lea guhkes hárjáneapmi mediasuorggis, dadjá son.
Digitála vuoruhemiin barget
Ávviris leat 21 jahkebarggu doaimmahusas, ja sii barget guovtti váldokantuvrras. Kárášjogas ja Guovdageainnus. Dasa lassin leat kantuvrrat ja bargit maiddái Romssas, Deanus, Hársttáin ja Álttás.
Hermansen jáhkká sin digitála vuoruheami leamaš ávkin lohkkiid loguide.
– Jáhkán leamaš ávkin go mii leat vuoruhan digitálalaččat almmuhit áššiid ovddemus ja go mii leat vuoruhan digitála buktagiid. Mis lea neahttasiidu, podcasta, livepodat, streamemat, ja oaidnit ahte min lohkkit liikojit daidda hui bures. Lea maid ávkin leamaš jođánit almmuhit dáhpáhusaid ja ođđasiid, dadjá Hermansen.
Ovddosguvlui áigu Ávvir ain gokčat sámi áššiid buoremus lági mielde.
– Mii orrut goit rievttes geainnu alde, nu ahte mii doalahallat seamma geainnu ain ovddosguvlui. Muhto nu go eará ge mediaásahusat, leat mii maid rahčan oažžut olbmuid virggiide, earenoamážit olggobealde guovddáš sámi báikkiid nu go Guovdageainnu ja Kárášjoga, dadjá son.
Ságat lea status quo
Sámi aviisa mii čállo dárogillii, Ságat, lea bisson diŋgojeddjiid dáfus juste seamma logus go diibmá seamma áigodagas, 3092 diŋgojeaddji. Ságaid redaktevra Geir Wulff háliida vuosttažettiin illudit go Ávvir ovdána.
– Lea hirbmat buorre go Ávvir ovdána nu sakka. Lean hui lihkolaš, lea máilmmi buorre ahte sámi aviisa oažžu eambbo lohkkiid. Ságat gal bissu seamma dásis, ja dasa soitet leat máŋga siva. Muhto mii dadjat mii leat duhtavaččat go lohku ii leat njiedjan. Eat mii dovdda mii leat gilvaleaddjin gal Ávvirii, dadjalastá Wulff .
Ságat lea maŋemus jagiid lassánan jagis jahkái.
– Mii leat duhtavaččat go leat badjel golbma duháha diŋgojeaddji. Lohkkiidlogut gal leat mealgat eanet dieđusge, dadjá Wulff.
