Golggotmánu 1. beaivvi rájes lea Ávviris fas journalista Deanus.
Silje Malene Varsi, gii maŋemus jagiid lea bargan Ávvira Oslo kantuvrras, lea máhccan davás fas ja fárren Detnui. Ávviris ii leat guhkes áigái leamašan fásta bargi Deanus.
– Mii leat guhká háliidan ja rahčan gávdnat journalistta Detnui gii sáhttá gokčat Deanu, Unjárgga ja eará guovlluid Nuorta-Finnmárkkus. Danne leat ge hui ilus go dál lea mis journalista sajis Deanus, lohká Ávvira váldodoaimmaheaddji Kari Lisbeth Hermansen.
Fágabiras
Silje Malene Varsi lea oahpis Nuorta-Finnmárkui. Son lea moadde jagi bargan Ávvira Girkonjárgga kantuvrras ovdal go fárrii Osloi. Deanus lea Ávvira journalisttas kantuvra NRK Sámi ođđa visttis Deanušalddis.
– Mii leat giitevaččat go min journalista beassá NRK Sámi bargiiguin seamma dáhki vuollái, go de lea sus maid fágabiras birra, vaikko lea áidna Ávvira bargi doppe. Dan jáhkkit mii sáhttit leat ovdamunnin ja buoret molssaeaktun go eará báikkis láigohit kantursaji, lohká váldodoaimmaheaddji.
Sávvá bures boahtima
Dál, go journalista lea sajis, de Hermansen sávvá ahte olbmot guovlalit Ávvira kantuvrras.
– Dál, go mis lea fásta journalista Deanus, de lea mis mihttun ahte mii galgat olu buorebut nagodit gokčat sámi áššiid ja dáhpáhusaid dien guovllus. Mii dieđusge maid sávvat ahte olbmot áŋgirit cavgilit áššiid ja áinnas maid finadit min journalistta ságain su kantuvrras Deanušalddis, lohká vel váldodoaimmaheaddji Kari Lisbeth Hermansen.
Ođđa árgabeaivi
Ovdal go fárrii Finnmárkui ja Detnui, de lei sus kantuvra Oslo Sámi viesus, gos lei okto kantuvrras. Geassebotta rájes lea sus leamaš gaskaboddosaš kantuvra ruovttus. Dál son illuda ođđa árgabeaivái.
– Lea ođđa árgabeaivi, šaddá hui buorre kantuvrii vuolgit, dadjá Silje Malene Varsi.
Mediabiras
Fárremis NRK-vistái son maid oažžu eará mediabargiid bargoustibin mas son oaidná stuorra ávkki.
– Somá go mediabiras lea. Sáhttit veahkkálagaid bargat ja gulaskuddat, mii lea stuorra ávkin, dadjá Varsi.
Buorre oainnus
Mediačalmmiid mielde son maid lea duhtavaš kantuvrasajiin.
– NRK-visttis leat fiinna lanjat, buori sajis. Oainnán mii geavvá márkanguovddážis, ja oainnán ođđa šalddi, mii lea oalle buorre oainnus, dadjá Varsi.
Cavgileamit
Son sávvá ahte dál, go Ávvir viimmat lea fas Deanus, de olbmot galledit su.
– Áinnas fitnat guossis, muhto dál koronaáigge livčče buoremus čuodjalit dahje čálistit, jus leat cavgileamit dahje áššit mat berrejit ovdan boahtit, dadjá Varsi.
