-Almmuhus-
Featured box1Ávvira sátta Sámi álbmot­beaivvi: –Šaddá ivdnái ja miellagiddevaš

Ávvira sátta Sámi álbmot­beaivvi: –Šaddá ivdnái ja miellagiddevaš

-

-

Go lea ávvujahki de lea Ávvir bovden veahá eambbo studiogussiid go ovdal. Dasa lassin leat maid eambbo artisttat. Diehttelasat lea báiki maid ođas, go dán jagi filbmejit Sámi Siiddas Álttás.

– Sámi álbmotbeaivi ávvuduvvui vuosttaš geardde 1993:s, nu ahte dán jagi ávvudat 30 jagi ja dan oaidnit maid sáddagis. Sáddagii bohtet veahá eanet guossit go maid ovdal leat leamašan, ja leat maiddái artisttat geat juiget ja lávlot min prográmmas. Lohpidan ahte šaddá miellagiddevaš! Nu muitala Ávvira neahttaredaktevra Berit Marie Lise Eira, gii jođiha prošeavtta. Son lohká galgat leat dakkár sátta masa čáhká Sámi álbmotbeaivvi máŋggabealatvuohta, sihke duođalaš bealit ja gehppes áššit. 

– Sámi álbmotbeaivvi duogáš han leat sámi dáistaleapmi, muhto galgá maid leat ávvubeaivi, ja nu fertejit fáttát leat sihke veahá politihkalaččat ja duođalaččat, muhto maiddái biebmu, bivttasteapmi ja musihkka galgá mielde dákkár beaivvi. Dasa lassin ávvubeaivi gullá maiddái mánáide, danne ferte sidjiide maid juolluduvvon oassi, dadjá son. 

Háliida čájehit viidodaga

Guossit dán prográmmas leat sápmelaččat geat leat áigeguovdilat iešguđet áššiid geažil, muhto maiddái veahá dábálaš olbmot.

– Mii leat jurddašan ahte guossit galget leat miellagiddevaččat sámi gehččiide ja mii galgat beassat oahpásnuvvat iešguđet fáttáide nu go ođđa juigiide ja veahá eambbo hárjánan musihkkáriidda, politihkalaš áššiide ja maiddái oahppat kohkket sámi biepmu veahá earáládje.

Dál lea goalmmát geardde go Ávvir dáinna lágiin sádde álbmotbeaivesáddaga. Vuosttaš geardde filbmejuvvui Guovdageainnus 2021:s, diibmá Kárášjogas ja dán jagi báddejuvvo ges Sámi Siiddas Álttás.

– Mii diehttelasat gazzat oahpu juohke jagi ja ovdánat veahážiid mielde. Stuorámus hástalus lea sáddagii oažžut sisdoalu mii govve ahte Sápmi lea viiddis, muhto mii geahččalat nu bures go nagodat, unna doaimmahusažis gos seammás galgat buvttadit maid ođđasiid sihke nehttii ja báberáviisii. 

Visot galgá sámegillii

– Mii ráhkadat dán sáddaga danin go háliidat fállat lassi sisdoalu sámi gehččiide Sámi álbmotbeaivvi. Sápmelaččain eai leat nu olu mediat maid gaskka sáhttet válljet, ja danne háliidat mii leat mielde lasiheamen fálaldaga. Sátta lea sápmelaččaid várás, ja visot lea sámegillii, lasiha Eira. 

Sáddaga sáhttet geahččat buohkat geat dollet Ávvira. Dat čájehuvvo avvir.no:s, guovvamánu 6. beaivvi diibmu 18.00. Sáddaga lea maid vejolaš maŋŋil oaidnit jus juste dalle it astan čohkkedit.

-Almmuhus-