-Almmuhus-
-Almmuhus-
GUOLLELIHKUÁvvira «Guolle­lihkku» oaggun­gilvu lea álgga­huvvon!

Ávvira «Guolle­lihkku» oaggun­gilvu lea álgga­huvvon!

-

-

Lehpet go oaggume guliid dán geasi? Govvestehpet, sáddestehpet midjiide dieđuid ja searvabehtet «Guollelihkku» mánáidoaggungilvui. 

Dán geasi lágida Ávvir fas oaggungilvvu mánáide ja nuoraide, mas leat buorit vuoittut ja mii addá somás geasselohkama buohkaide. Vuollelis dán áššis čužžot eambbo dieđut gilvvu birra. 

Ávvira váldodoaimmaheaddji Kari Lisbeth Hermansen sávvá buori oasálasttima gilvui, ja illuda oaidnit mánáid ja nuoraid govaid ja fearániid.

– Mii sávvat nuorra guollebivdit dán jagi maid servet ja sáddejit govaid go leat guliid goddán jogain, jávrriin dahje mearas. Láve maid hui somá lohkat sin bivdofearániid, lohká Ávvira váldodoaimmaheaddji.

«Guollelihkku» oaggungilvu lea lágiduvvon máŋga jagi juo, ja váldodoaimmaheaddji jáhkká gilvvu buktit ilolaš lohkama. 

– Mánáid oaggungilvvu gal mii fertet juohke geasi lágidit. Dasa leat min nuoramus lohkkit liikon bures. Mii leat 4-5 jagi juo lágidan dan ja juohke jagi leat mánát leamašan áŋgirat searvat gilvui, muitala Kari Lisbeth Hermansen.

Ávvira geassebargi doaimmaha gilvvu

Dán geasi oaggungilvvu lágideaddji ja geassebargi, Sárá Gáren Ánne Nilut, muitala ahte juohke vahkku vuorbáduvvo okta vuoiti. Ja ii dasa galle, buot oassálastit unnimusas stuorimussii ožžot vel juoidá go servet gilvui. 

JUOHKÁ VUOITTUID: Ávvira geassebargi Sárá Gáren Ánne Nilut muitala ahte buot oassálastit ožžot juoidá, muhto juohke vahkku vuorbáduvvo okta vuoiti gii oažžu veahá stuorebuš skeaŋkkaža. Govva: Kari Lisbeth Hermansen
JUOHKÁ VUOITTUID: Ávvira geassebargi Sárá Gáren Ánne Nilut muitala ahte buot oassálastit ožžot juoidá, muhto juohke vahkku vuorbáduvvo okta vuoiti gii oažžu veahá stuorebuš skeaŋkkaža. Govva: Kari Lisbeth Hermansen

– Buohkat geat sáddejit gova, ožžot skeaŋkkaža boastta mielde. Juohke vahkku vuorbádit vel oaggustávrra ovtta oasseváldái dan vahkku. De ii leat eará go geassit guliid gáddái!, lohká geassebargi Sárá Gáren Ánne Nilut, gii illuda lágidit geassegilvvu. 

Ná searvvat «Guollelihkku» oaggungilvui!

Ávvira jahkásaš oaggungilvui sáhttet mánát ja nuorat vuollel 18 jagi searvat. Govat almmuhuvvojit avvir.no siiddus ja Ávvira báberaviissas. 

Deaddil dákko, searvva ja deavdde buot dieđuid ruođuid siste!

Gilvvu njuolggadusat:

Gilvu álgá bearjadaga geassemánu  25. beaivvi 2021 ja bistá gitta borgemánu 15. beaivái diibmu 24.00 rádjái.

Gilvui sáhttá searvat vaikko makkár guliin, beare lea goddon oaggunstávrráin.

Guolli oažžu leat goddon vaikko gos, muhto ferte leat goddon 2021 geasi.

Juohke vahkku vuorbádit ovtta oasseváldi guhte dan vahkku lea dieđihan guoli, ja son vuoitá oaggunstákku. Sus lea dan vahkku «Guollelihkku».

Buohkat geat sáddejit guollegova ožžot skeaŋkkaža Ávviris. Muitte čállit iežat poastačujuhusa.

Loahpas geasi leat maid buohkat geat oassálastet mielde vuorbádeamis mas sáhttá vuoitit 1500 ruvnno árvosaš skeaŋkakoartta.

Ávvira bargit ja sin lagamusat eai beasa searvat gilvui.

-Almmuhus-