-Almmuhus-
-Almmuhus-
-Almmuhus-
OĐĐASATÁvvira cuoŋománu 1. beaivvi leaika jáhkihii

Ávvira cuoŋománu 1. beaivvi leaika jáhkihii

-

-

Dá lei Ávvira cuoŋománu 1. beaivvi leaika, go almmuheimmet ahte SGP vuoiti beassá gilvalit MGP:s, muhto buohkaide ii lean áibbas jáhkkemeahttun ođas.

Nu go juo lea ge Ávviris vierru, de mii leaikkastallat iežamet lohkkiiguin cuoŋománu 1. beaivvi.

Dán jagi lei leaikan dát ášši, mas mii muitaleimmet ahte Sámi Grand Prix vuoiti beassá Melodi Grand Prix gilvvu finálii.

Dat diehttelasat lei dušše leaika.

Ávviris eat vuohttán erenoamáš reakšuvnnaid dan ášši oktavuođas.

 

Bivde jearahallama

Sámi Musihkkafestivála buvttadeaddjis, Ol-Johan Gaupas, goitge lei veahá somás vásáhus leaikka oktavuođas.

Son lei diehttelasat ieš mielde leaikkas, ja de beasai ge veahá boagustit maid dan oktavuođas.

Son muitala sotnabeaivvi ožžon telefuvnna muhtun medias, gii háliidii šiehttat suinna jearahallama mánnodatiđida, muitalan dihte eambbo dan MPG-šiehtadusa birra.

 

Dáikkihii

– Mun jerren sus makkár beaivi ikte lei. Son vástidii ahte lei lávvordat. Mun jerren sus de makkár dáhton dat lei ikte. De son vástidii cuoŋománu vuosttaš beaivi, ja de easka dáikkihii ahte gusto lea leamaš cuoŋománu 1. beaivvi leaika Ávviris. Dalle gal lei hui jođán geargat hupmamis, boagusta Gaup.

– Lei várra nu jáhkehahtti diet leaika, lohká son.

Ávvirii ii lihkostuvvan oažžut ságaide media mii lei áigon ráhkadit ášši dás.

 

Rievddada

Cuoŋománu leaika lea dovddus olles Eurohpás, earret Spánias.

Doppe lea leaikkastallan beaivi juovlamánu 28. beaivvi, nu gohčoduvvon «vigihis mánáid beaivi».

Iránas fas cuoŋománu 3. beaivvi.

 

Dovddus cuoŋománu leaikkat

1957, ja várra buot eanemus dovddus leaika: «BBC čájehedje PANORAMA TV-prográmmas go Sveitsas olbmot šaddadit spageahttamuoraid. Olbmot álge riŋgedit gullan dihte movt sii sáhtáše maid spageahttamuoraid gilvit».

1965: «BBC dieđihii ahte áigot geahččalit TV-signála mielde sáddet hája. Maŋŋel ožžo dieđu máŋgga geahččis ahte sii dovde bures dan hája man galge leat sádden TV-signála mielde».

1997: «Eŋgelas áviissat čálle ahte Stuora-Británnia lei šiehtadan ahte sidjiide galgá ain gullat Hong Kong, muhto dan ovddas oažžu Kiinná Davvi-Irlándda».

2008: «Statkraft dieđihii ahte sii nagodit dál ráhkadit energiija násttiin».

-Almmuhus-