-Almmuhus-
OĐĐASATÁvvir váldá mávssu guktii miessemánus

Ávvir váldá mávssu guktii miessemánus

-

-

Ávvira máksinvuogádagas leat leamašan váttisvuođat, mat dál váikkuhit min geavaheddjiide.

 

Cuoŋománus ledje váttisvuođat Ávvira neahttasiiddus, mat dál váikkuhit min geavaheddjiide.

 

Mákset guktii

Ávvira máksinvuogádat ii doaibman nu mo galggai, ja nu ii gesson máksu buot Ávvira abonneanttain cuoŋománus.

– Go váttisvuohta čovdojuvvui miessemánu 14. beaivvi, de dat mielddisbuktá ahte dalle gessui máksu guovtti mánu ovddas, čilge geavaheaddjimárkana ovdasvástideaddji Ann-Siri Vesterslett.

 

– Eai leat duppalit máksen

Vesterslett deattuha ahte sii, geain dál lea guktii gesson máksu, eai leat duppalit máksán.

– Sis lea dušše gessojuvvon máksu dan áigodaga ovddas man eai máksán cuoŋománus, go vuogádat ii doaibman, čilge son.

 

Muhtimat eai leat beassan sisa

Ávvira neahttasiiddu bokte lea vejolaš diŋgot sisabeassama plussa-áššiide, ja nu maiddái beassat lohkat e-aviissa. 

Dán vuogádagas dat leat ge leamašan hástalusat cuoŋománus, ja dat ii leat váikkuhan dušše máksimii.

– Leat muhtin geavaheaddjit geat eai leat beassan čálihit sisa min siidui dáid váttisvuođaid geažil, ja mii váldit dál oktavuođa singuin. Sii ožžot de ođđa fálaldaga mis, čilge son.

 

Šállošat

– Mii šállošat dáid váttisvuođaid ovddas, muhto dál galgá visot doaibmat nu mo galgá fas, dadjá Vesterslett.

Ávvir ávžžuha muđuid ge geavaheddjiid váldit oktavuođa jus vásihit váttisvuođaid min neahttasiidduin.

Dan sáhttá dahkat juogo Facebook bokte, telefuvnna bokte, 934 40 700, dahje e-poastta bokte: redaksjonen@avvir.no.

-Almmuhus-