-Almmuhus-
OĐĐASATÁvvir streame dán jagi Sámi Grand Prix

Ávvir streame dán jagi Sámi Grand Prix

-

-

– Sámi Grand Prix rahppo buohkaide Sámis, ii ge dušše sidjiide geat leat Báktehárjjis, dadjaba Sámi Musihkkafestivála jođiheaddji Ken Are Bongo ja buvttadeaddji Ida Holm Hansen.

Disdaga almmuhii Sámi Musihkkafestivála ja Ávvir ovttasbarggu čájehit Sámi Grand Prix njuolggosáddaga bokte.

– Sámi stuora mediaásahus galgá streamet SGP mii lea sámi stuorámus musihkkagilvu, ja lea hui suohtas go Ávvir háliida dahkat dan, lohkaba Ken Are Bongo ja Ida Holm Hansen geat leaba ilus go Ávvir lea mielde dan doaimmas.

Buohkaide sáttan

Bongo ja Holm Hansen muitaleaba ahte ii leat hehttehussan guđe gos olbmot háliidit čuovvut sáddaga, ja guđe bealde ráji geahččit leat.

– Buohkat besset geahččat sáddaga, lea nuvttá ja rabas buohkaide, dadjaba soai.

– Mii sávvat maid ahte olbmot bohtet hállii geahččat Sámi Grand Prix. Lea áibbas earálágán vásáhus boahtit Báktehárjái geahččat Sámi Grand Prix albmaduođas, lohká Bongo. 

– Dat addá olbmuide eará báikkiin go Guovdageainnus vejolašvuođa čuovvut mielde ja leat mielde jienasteamis ja sáhttet aktiivalaččat searvat Sámi Grand Prix gilvui, lohká Holm Hansen.

Plánegohtet movt galgá šaddat

Festiválajođiheaddjis Bongos lea buorre doaivva Ávvirii.

– Ávvir lea álgán bures hárjánit sáddet njuolggosáddagiid, ja lea stuora oahppu Ávvirii ja midjiide viidáset, dadjá son.

Sámi Musihkkafestivála lea gearggus maid plánegoahtit makkár streamen galgá oaidnit ja movt doaibmat, ja guđiid čovdosiid galgat válljet go galgá leat buorre oaidnit šearpmas.

Ken Are Bongo lea hárjánan filbmabargi ja lea mielde ráhkadeame gaskavideoid mat čájehuvvojit gilvvus.

Čohkkejit Sámi

Buot njealji riikkas sáhttet oasseváldit leat mielde ja addá ge vejolašvuođa buohkaide čuovvut mielde sin guovllu artistta ja searvat jienasteapmái. 

– Lea dakkár doaibma mii čohkke Sámi Grand Prixa ja mii lea ge dan ulbmil čájehit dan rabasvuođa ja čájehit ahte olles Sápmi lea mielde dán stuora lávlungilvvus, lohká Bongo.

Ávvira vuoruhansuorgi

Ávvir ii leat ovdal čađahan ná stuora buvttadeami ja áigot bidjat olu návccaid beassášlávvordaga.

– Mii leat hui ilus go mii leat ožžon dán fálaldaga ja vejolašvuođa. Sámi Grand Prix leat okta sámi stuorámus musihkkadáhpáhusain ja min mielas lea dehálaš ahte olbmot miehtá Sámi, dahje dadjat juo miehtá máilmmi, galget beassat vásihit dan.  Njuolggosáddagat leat ge okta min vuoruhansurggiin ja mii áigut bidjat olu návccaid sáddet nu buori njuolggosáddaga go vejolaš Sámi Grand Prixas beassášlávvordaga.  Mis eai leat ovdal leamašan ná stuora buvttadeamit ja mii viežžat teknihkalaš veahki Altapostenis dán buvttadeami čađaheapmái, dadjá Ávvira váldodoaimmaheaddji Kari Lisbeth Hermansen.

-Almmuhus-