Boahtte vahkkoloahpa leat NM-gilvvut heargevuodjimis Romssas.
Sotnabeaivvi leat heargevuodjingilvvut, ja dat álgahuvvojit rahpamiin diibmu 12.50. Dasto jotket gilvvut ja beaivi loahpahuvvo vuoitojuohkimiin diibmu 15.00.
Njuolggosátta
Jus olbmuin ii leat vejolašvuohta boahtit Romsii, Storgatai, čuovvut Norggameašttirgilvvuid, de lea dán jagi vejolaš čuovvut dáid njuolggosáddaga bokte.
Ávvir oainnat rávdnje guktuid gilvvuid, muitala váldodoaimmaheaddji Kari Lisbeth Hermansen.
– Midjiide lea hui erenomáš rávdnjet nie stuora gilvvuid, ja mis lea ge mihttu gokčat eanet sámi valáštallansurggiid sihke čálalaččat ja rávdnjema bokte. Mii dovdat ahte lea min ovddasvástádus daid loktet oidnosii ja dá lea maid dieđusge juoga maid min lohkkit liikojit čuovvut.
Rávdnjen geasuha
Norggameašttirgilvvut heargevuodjimis ja njoarosteamis eai leat goassege ovdal rávdnjejuvvon. Ávvira bealis illudit dasa ja sávvet ahte oallugat gehččet njuolggosáddaga, vaikko dán jagi dađibahábut eai šatta njoarostangilvvut.
– Mii leat oaidnán ahte lea stuora beroštupmi go rávdnjet spábbačiekčandoaluin, ja dál lea gelddolaš oaidnit olahit go NM-gilvvuiguin oallugiidda, lohká Hermansen.
Njuolggosáddagis leat gilvvut oaidninláhkai ja jurdda lea ahte «speakera» jietna maid gullo sáddagis. Dasa lassin lea Ávviris journalista báikkis gii jearahallá oasseváldiid sáddagis.
