-Almmuhus-
-Almmuhus-
KULTUVRA Ávvir sádde ávvu­sáddaga man beasat čuovvut neahta bokte

Ávvir sádde ávvu­sáddaga man beasat čuovvut neahta bokte

-

-

Ávvira lohkkiide ráhkaduvvo erenoamáš ávvusátta dán jagi go «buot lea earálágan», ja sáddaga oainnát Sámi álbmotbeaivvi maŋŋelgaskabeaivvi.

Ávvir álggahuvvui guovvamánu 6. beaivvi 2008:s ja ávvuda dán jagi lea 13 jagi doaibman sámi aviisan. Álggus lei bábir váldobuvtta, ja dađistaga lea Ávvir maid čuvvon digitála máilbmái luotta.

Dán jagi šaddá ávvudeapmi Sámi álbmotbeaivvi veahá earálagán.

– Lea hui somá go dán beaivvi sáhttit viiddidit Ávvira fálaldaga. Lea vuosttaš geardde go mis lea dan mađe stuora sátta,  lohká Ávvira váldodoaimmaheaddji Kari Lisbeth Hermansen.

Go šattai ná erenoamáš covid-19 dihte dán jagi, de heivii hui bures Ávvirii válljet ráhkadit sáddaga.

– Eat sáhte čoagganit ja seammás háliidit čalmmustahttit dan beaivvi ja čájehit oasážiid mii geavvá miehtá Sámi, lohká Ávvira váldodoaimmaheaddji Kari Lisbeth Hermansen.

Studiogussiid bovden

– Mis leat guokte prográmmajođiheaddji ja vihtta studioguossi geat bohtet veahá hállat duoji, musihka ja politihka birra, ja luohti maid gullo dán sáddagis. In hálit suođđat geat dat guossit leat, boagusta Ávvira journalista Berit Marie Lise Eira, gii lea mielde buvttadeame sáddaga.

ÁVVUSÁTTA: Berit Inger Eira (gurut bealde) ja Iselin Skum (olgeš bealde) leaba Ávvira ávvusáddaga prográmmajođiheaddjit, ja Elen Marianne Utsi (čuožžu govas) ja Sara Risten Susanna leaba soai geat čuohppaba ja heiveheaba sáddaga. Govven: Anne Gro Gaup
ÁVVUSÁTTA: Berit Inger Eira (gurut bealde) ja Iselin Skum (olgeš bealde) leaba Ávvira ávvusáddaga prográmmajođiheaddjit, ja Elen Marianne Utsi (čuožžu govas) ja Sara Risten Susanna leaba soai geat čuohppaba ja heiveheaba sáddaga. Govven: Anne Gro Gaup

– Beassat veahá oaidnit movt mánát muđuid leat ráhkkanan álbmotbeaivái, lohká Eira.

Sátta čájehuvvo Sámi álbmotbeaivvi diibmu 18 rájes avvir.no siiddus ja lea Ávvira plussalohkkiide. 

Ávvira redaktevra Kari Lisbeth Hermansen lohká dehálašvuođa Sámi álbmotbeaivvi ávvudit go lea sámiid oktasaš beaivi mii nanne oktiigullevašvuođa, ja goas njulgestaga čevllohallat iežamet gielain, kultuvrrain ja duogážiin.

– Go šaddá nu dán jagi ahte mis lea neahta bokte fálaldat, de lea maid dat jurdda ahte mii olahit eanet olbmuid go livččiimet dahkan, dadjá Hermansen.

Váldet vuhtii koronanjuolggadusaid

Sátta lea juoga man Ávvir ii leat dahkan ovdal, ja lea ovdagihtii báddejuvvon maid olbmot sáhttet geahččat Ávvira neahttasiiddus lávvordaga maŋŋelgaskabeaivvi.

– Leat hástalusat koronanjuolggadusaid geažil ahte eat sáhte čohkket gussiid deike geat sáhttet geahččat sáddaga go báddejuvvo, ja váldit veahá vuhtii njuolggadusaid doallat gaskka, ja plánet makkár gussiid váldit deike go dál leat mátkkoštangildosat. Mii háliidit bissut daid njuolggadusaid siskkobealde, dadjaba Eira ja Hermansen.

-Almmuhus-