-Almmuhus-
-Almmuhus-
OĐĐASAT Ávvir ovdánan sakka oanehis áiggis

Ávvir ovdánan sakka oanehis áiggis

-

-

Nannen dihte digitála vuoruheami, lávki Ávvir dan veahá eahpesihkkaris geainnu ala mii čájehuvvui leat sukseassan. Logut čájehit ahte Ávvir ovdána, ja lohkkiidiskkadeamis leat maid buorit bohtosat. 

Geassemánu 19. beaivvi diibmá bođii Ávvir luoddaerrui go šattai mearridit – váldigoahtit mávssu vai ain addit nuvttá áššiid lohkkiide.

Nannen dihte digitála vuoruheami, lávkii Ávvir dan veahá eahpesihkkaris geainnu ala mii čájehuvvui leat sukseassan.

Dan rájes leat Ávviris 38 proseanttain lassánan geavaheaddjit geat mákset dan ovddas.

Ávvira neahttajođiheaddji, Berit Marie Lise Eira, lohká dán dakkár ovdáneapmin man ii lean duostan niegadit ge.

– Dalle álggos, go rabaimet plussa, de dieđusge árvvoštalaimet ahte jus lea veahá ovdáneapmi, de lea dat buorre, muhto mii eat duostan eat doaivut ge ahte 38 proseantta lassáneapmi galggai šaddat ná oanehis áiggis. Dat čájeha ahte lohkkit leat mielas máksit min áššiid ovddas, ja dan dihte leat mii hui ilus ja giitevaččat, dadjá Eira.

 

Viidát fálaldat lohkkiide

Maŋŋel go plussa rahppui, de boahtigohte eambbo áššit nehttii.

– Dat mearkkašii ahte eat dárbbašan šat árvvoštallat makkár áššiid bidjat nehttii, beassat bidjat buot áššiid mat bábiráviisii čállojit, nehttii maid. Nu lea maid šaddan viidát fálaldat iežamet lohkkiide.

Vaikko Ávvir manná rievttes guvlui, de ii loga neahttajođiheaddji meinet vuoiŋŋastišgoahtit gal.

– Go dál lea mis dát lassáneapmi leamaš, de dat ii aŋkke mearkkaš ahte mii bisánit vuoiŋŋastit. Mis leat ain plánat ovddánahttit min digitála fálaldaga buorrin min geavaheddjiide ja nu sávvat loguid maid ain ovdánit boahtteáiggis. Strategiijabargu, mii dál lea jođus, bidjá maid vuođu dasa mo mii vuoruhat neahttafálaldaga boahtteáiggis, dadjá Eira.

Geahččat ain ovddasguvlui

Ávviris lea dál juste strategiijabargu jođus man ulbmil lea geahččat ovddasguvlui ja mo ain galgat vuoruhit boahtteáiggis.

Dan oktavuođas lea Ávvir čađahan lohkkiidiskkadeami masa badjel 500 olbmo leat vástidan. 

– Dat lei dieđusge olu eambbo go leimmet vuordán. Dat mii lei earenoamáš somá lei go oallugat ledje čállán oaiviliid, rámi, cuiggodan ja addán rávvagiid. Dat lea hui buorre min mielas. Dál, go galgat geainnu hutkat viidáset, de dárbbašit daid. Dat kommentárat addet midjiide buore vuođu bargat viidáset strategiijaplánain. Mii váldit buot duođalažžan maid leat ožžon, cuiggodemiid maid. Leat hui giitevaččat go ná oallugat čájehedje beroštumi ja háliidit min veahkehit viidáset, dadjá Ávvira váldodoaimmaheaddji, Kari Lisbeth Hermansen.

Hermansen dovdá álbmogis leat stuora vuordámušaid go Ávvir lea áidna sámegiel aviisa, dan lea oaidnán lohkkiidiskkadeami bohtosiin.

– Olbmuin leat hui stuora vuordámušat midjiide. Dat geatnegahttá min. Oaidnit ahte leat vátna sámi čálalaš mediat, mii leat measta áidna, mii dagaha ahte lohkkit vurdet mis nu viiddis sisdoallu maid mii eat soaitte oba nákcet ge. Leat olu vuordámušat ovtta ja seamma aviisii, galggašeimmet gokčat nu olu dárbbuid. Galggašeimmet leat fágabláđđi, nuoraide fálaldagat, sámi boaresolbmuide fálaldagat. Dat lea nu viiddis, visot sámi servodat galggašii čáhkat dohko.

 

– Hui movttiidahtti

Dat lohkkiidiskkus čájeha ahte badjel bealli sis, geat leat vástidan, leat duđavaččat bargguin.

– Dat lea hui movttiidahtti midjiide. Doppe lea stuora oassi geat eai leat áibbas duđavaččat. Mii leat ilus ja movttegat go ná stuora oassi lea geat leat duđavaččat, muhto váldit maid duođas sin geat eai leat duđavaččat. Boahtteáiggis áigut buoridit nu ahte sii maid šaddet duđavažžan. Addet buori vuođu ja signálaid mo buoridit ja mainna eai leat duđavaččat. 

 

Bures boahtimat rámidit ja cuiggodit, vaikko goas

Vaikko dál lea aiddo čađahuvvon lohkkidiskkadeapmi, de bovde Hermansen lohkkid rámidit ja cuiggodit Ávvira vaikko goas.

– Ii leat nu ahte lea dušše oktii jagis go min beassá rámidit dahje cuiggodit. Lohkkit leat álo bures boahtimat čálistit min áššiid birra dahje cavgilit áššiid birra. Háliidivččimet lagas gulahallama lohkkiiguin, eai galgga ballat neavvumis min, eai ge cuiggodeames. Go dainna maid oahppá, loahpaha Hermansen.

- Advertisement -
-Almmuhus-