Ávvira Guovdageainnu doaimmahus lea dál gávdnamis guovdu márkana, go guovtti vahkku áige sii fárrejedje.
Ávvira Guovdageainnu doaimmahus lea daid maŋemus jagiid leamaš LES-viesus. Dál eai leat kantuvrrat šat doppe.
Stuora, fiinna lanjat heivehuvvon mediabargguide
Guovtti vahkku áigi fárrii Ávvira Guovdageainnu doaimmahus eará vistái márkanis, lanjaide mat leat buorebut heivehuvvon.
– Dál leat mis stuora, fiinna lanjat mat leat eanet heivehuvvon min dárbbuide, lohká Ávvira váldodoaimmaheaddji, Kari Lisbeth Hermansen, gii lea Ávvira Guovdageainnu bargoveagain fárren ođđa lanjaide.
LES-viesus, dahje Loaŋkogielas, leat sii leamaš 2011 rájes.
– Mis lei buorre dilli LES-viesus, muhto dat lanjat maid doppe láigoheimmet eai leat šat nu bures heivehuvvon mediabargguide. Mii ovdánahttit iežamet buktagiid ja nu maid čuožžilit eará dárbbut mis. Mii bargat dál eanet jienain ja filmmaiguin go ovdal ja dárbbašeimmet earret eará sierra govva- ja jietnaredigerenlanja, čilge Hermansen.
Buoret bargodilli
Ávvira ođđa lanjat leat maid stuorábut go ovddit lanjat gos ledje ja dat buktá maid ođđa vejolašvuođaid doaimmahussii. Buot ii leat vel áibbas sajis, muhto leat buori muddui sajáiduvvan ođđa kantuvrraide.
– Mii oaidnit dál juo man olu buoret bargodilli mis šaddá go lanjat leat eanet heivehuvvon min dárbbuide, dadjá Hermansen.
Ávvir lea earret eará podkasta buvttadišgoahtán, mii gáibida lanja heivehuvvon dasa.
– Mis leat dál stuora lanjat ja sáhttit maid lágidit studiosáddagiid iežamet dáhke vuolde. Dál eat ge juogat oktasaš lanjaid earáiguin ja sáhttit buot areála geavahit iežamet bargguide dalle go mis lea dárbu.
Álkit olbmuide finadit guossis
Ávvira ođđa kantuvrrat leat guovdu márkana, boares SeastinBáŋkku lanjain. Seamma visttis go NRK Sápmi, ja Guovdageainnu lagasrádio ránnjávisttis.
Dat dagaha ahte Ávvir lea maid dál eanet oidnosis Guovdageainnu márkanbáikkis, go ođđa lanjat leat guovdu márkana.
– Dat maid dieđusge lea buorre go mii dál leat beassan guovdu márkana. Dat álkkidahttá olbmuide finadit min luhtte, lohká Kari Lisbeth Hermansen vel.
